બ્રહ્મ પુરાણ · અધ્યાય 132

યક્ષિણીસંગમં નામ તીર્થં સર્વફલપ્રદમ્
તત્ર સ્નાનેન દાનેન સર્વાન્ કામાન્ અવાપ્નુયાત્ ॥

યત્ર યક્ષેશ્વરો દેવો દર્શનાદ્ ભુક્તિમુક્તિદઃ
તત્ર ચ સ્નાનમાત્રેણ સત્ત્રયાગફલં લભેત્ ॥

વિશ્વાવસોઃ સ્વસા નામ્ના પિપ્પલા ગુરુહાસિની
ઋષીણાં સત્ત્રમ્ અગમદ્ ગૌતમીતીરવર્તિનામ્ ॥

દૃષ્ટ્વા તત્ર ઋષીન્ ક્ષામાન્ સા જહાસાતિગર્વિતા
યા ગત્વાશ્રાવય વૌષડ્ અસ્તુ શ્રૌષડ્ ઇતિ સ્થિરમ્ ॥

વિસ્વરેણ બ્રુવતી તાં તે શેપુઃ સ્રાવિણી ભવ
તતો નદ્ય્ અભવત્ તત્ર યક્ષિણીતિ સુવિશ્રુતા ॥

તતો વિશ્વાવસુઃ પૂજ્ય ઋષીન્ દેવં ત્રિલોચનમ્
સંગમ્ય ચૈવ ગૌતમ્યા તાં વિશાપામ્ અથાકરોત્ ॥

તતઃ પ્રભૃતિ તત્ તીર્થં યક્ષિણીસંગમં સ્મૃતમ્
તત્ર સ્નાનાદિદાનેન સર્વાન્ કામાન્ અવાપ્નુયાત્ ॥

વિશ્વાવસોઃ પ્રસન્નો ઽભૂદ્ યત્ર શંભુઃ શિવાન્વિતઃ
શૈવં તત્ પરમં તીર્થં દુર્ગાતીર્થં ચ વિશ્રુતમ્ ॥

સર્વપાપૌઘહરણં સર્વદુર્ગતિનાશનમ્
સર્વેષાં તીર્થમુખ્યાનાં તદ્ ધિ સારં મહામુને
તીર્થં મુનિવરૈઃ ખ્યાતં સર્વસિદ્ધિપ્રદં નૃણામ્ ॥