Brahma Purana · Chapter 130

āpastambam iti khyātaṃ tīrthaṃ trailokyaviśrutam
smaraṇād apy aśeṣāgha saṃghavidhvaṃsanakṣamam //

āpastambo mahāprājño munir āsīn mahāyaśāḥ
tasya bhāryākṣasūtreti patidharmaparāyaṇā //

tasya putro mahāprājñaḥ karkināmātha tattvavit
tasyāśramam anuprāpto hy agastyo munisattamaḥ //

tam agastyaṃ pūjayitvā āpastambo munīśvaraḥ
śiṣyair anugato dhīmāṃs taṃ praṣṭum upacakrame //

trayāṇāṃ ko nu pūjyaḥ syād devānāṃ munisattama
bhuktir muktiś ca kasmād vā syād anādiś ca ko bhavet //

anantaś cāpi ko vipra devānām api daivatam
yajñaiḥ ka ijyate devaḥ ko vedeṣv anugīyate
etaṃ me saṃśayaṃ chettuṃ vadāgastya mahāmune //

dharmārthakāmamokṣāṇāṃ pramāṇaṃ śabda ucyate
tatrāpi vaidikaḥ śabdaḥ pramāṇaṃ paramaṃ mataḥ //

vedena gīyate yas tu puruṣaḥ sa parāt paraḥ
mṛto 'paraḥ sa vijñeyo hy amṛtaḥ para ucyate //

yo 'mūrtaḥ sa paro jñeyo hy aparo mūrta ucyate
guṇābhivyāptibhedena mūrto 'sau trividho bhavet //

brahmā viṣṇuḥ śivaś ceti eka eva tridhocyate
trayāṇām api devānāṃ vedyam ekaṃ paraṃ hi tat //

ekasya bahudhā vyāptir guṇakarmavibhedataḥ
lokānām upakārārtham ākṛtitritayaṃ bhavet //

yas tattvaṃ vetti paramaṃ sa ca vidvān na cetaraḥ
tatra yo bhedam ācaṣṭe liṅgabhedī sa ucyate //

prāyaścittaṃ na tasyāsti yaś caiṣāṃ vyāhared bhidam
trayāṇām api devānāṃ mūrtibhedaḥ pṛthak pṛthak //

vedāḥ pramāṇaṃ sarvatra sākāreṣu pṛthak pṛthak
nirākāraṃ ca yat tv ekaṃ tat tebhyaḥ paramaṃ matam //

nānena nirṇayaḥ kaścin mayātra vidito bhavet
tatrāpy atra rahasyaṃ yat tad vimṛśyāśu kīrtyatām
niḥsaṃśayaṃ nirvikalpaṃ bhājanaṃ sarvasaṃpadām //

etad ākarṇya bhagavān agastyo vākyam abravīt //

yadyapy eṣāṃ na bhedo 'sti devānāṃ tu parasparam
tathāpi sarvasiddhiḥ syāc chivād eva sukhātmanaḥ //

prapañcasya nimittaṃ yat taj jyotiś ca paraṃ śivaḥ
tam eva sādhaya haraṃ bhaktyā paramayā mune
gautamyāṃ sakalāghaugha saṃhartā daṇḍake vane //

etac chrutvā muner vākyaṃ parāṃ prītim upāgataḥ
bhuktido muktidaḥ puṃsāṃ sākāro 'tha nirākṛtiḥ //

sṛṣṭyākāras tataḥ śaktaḥ pālanākāra eva ca
dātā ca hanti sarvaṃ yo yasmād etat samāpyate //

brahmākṛtiḥ kartṛrūpā vaiṣṇavī pālanī tathā
rudrākṛtir nihantrī sā sarvavedeṣu paṭhyate //

āpastambas tadā gaṅgāṃ gatvā snātvā yatavrataḥ
tuṣṭāva śaṃkaraṃ devaṃ stotreṇānena nārada //

kāṣṭheṣu vahniḥ kusumeṣu gandho bījeṣu vṛkṣādi dṛṣatsu hema
bhūteṣu sarveṣu tathāsti yo vai taṃ somanāthaṃ śaraṇaṃ vrajāmi

yo līlayā viśvam idaṃ cakāra dhātā vidhātā bhuvanatrayasya
yo viśvarūpaḥ sadasatparo yaḥ someśvaraṃ taṃ śaraṇaṃ vrajāmi

yaṃ smṛtya dāridryamahābhiśāpa rogādibhir na spṛśyate śarīrī
yam āśritāś cepsitam āpnuvanti someśvaraṃ taṃ śaraṇaṃ vrajāmi

yena trayīdharmam avekṣya pūrvaṃ brahmādayas tatra samīhitāś ca
evaṃ dvidhā yena kṛtaṃ śarīraṃ someśvaraṃ taṃ śaraṇaṃ vrajāmi

yasmai namo gacchati mantrapūtaṃ hutaṃ havir yā ca kṛtā ca pūjā
dattaṃ havir yena surā bhajante someśvaraṃ taṃ śaraṇaṃ vrajāmi

yasmāt paraṃ nānyad asti praśastaṃ yasmāt paraṃ naiva susūkṣmam anyat
yasmāt paraṃ no mahatāṃ mahac ca someśvaraṃ taṃ śaraṇaṃ vrajāmi

yasyājñayā viśvam idaṃ vicitram acintyarūpaṃ vividhaṃ mahac ca
ekakriyaṃ yadvad anuprayāti someśvaraṃ taṃ śaraṇaṃ vrajāmi

yasmin vibhūtiḥ sakalādhipatyaṃ kartṛtvadātṛtvamahattvam eva
prītir yaśaḥ saukhyam anādidharmaḥ someśvaraṃ taṃ śaraṇaṃ vrajāmi

nityaṃ śaraṇyaḥ sakalasya pūjyo nityaṃ priyo yaḥ śaraṇāgatasya
nityaṃ śivo yaḥ sakalasya rūpaṃ someśvaraṃ taṃ śaraṇaṃ vrajāmi

tataḥ prasanno bhagavān āha nārada taṃ munim
ātmārthaṃ ca parārthaṃ ca āpastambo 'bravīc chivam //

sarvān kāmān āpnuyus te ye snātvā devam īśvaram
paśyeyur jagatām īśam astv ity āha śivo munim //

tataḥ prabhṛti tat tīrtham āpastambam udāhṛtam
anādy avidyātimira vrātanirmūlanakṣamam //