Brahma Purana · Chapter 121

vidarbhāsaṃgamaṃ puṇyaṃ revatīsaṃgamaṃ tathā
tatra yad vṛttam ākhyāsye yat purāṇavido viduḥ //

bharadvāja iti khyāta ṛṣir āsīt tapodhikaḥ
tasya svasā revatīti kurūpā vikṛtasvarā //

tāṃ dṛṣṭvā vikṛtāṃ bhrātā bharadvājaḥ pratāpavān
cintayā parayā yukto gaṅgāyā dakṣiṇe taṭe //

kasmai dadyām imāṃ kanyāṃ svasāraṃ bhīṣaṇākṛtim
na kaścit pratigṛhṇāti dātavyā ca svasā tathā //

aho bhūyān na kasyāpi kanyā duḥkhaikakāraṇam
maraṇaṃ jīvato 'py asya prāṇinas tu pade pade //

evaṃ vimṛśatas tasya svāśrame cātiśobhane
draṣṭuṃ munivaraḥ prāyād bharadvājaṃ yatavratam //

dvyaṣṭavarṣaḥ śubhavapuḥ śānto dānto guṇākaraḥ
nāmnā kaṭha iti khyāto bharadvājaṃ nanāma saḥ //

vidhivat pūjya taṃ vipraṃ bharadvājaḥ kaṭhaṃ tadā
tasyāgamanakāryaṃ ca papraccha purataḥ sthitaḥ //

kaṭho 'py āha bharadvājaṃ vidyārthy aham upāgataḥ
tathā ca darśanākāṅkṣī yad yuktaṃ tad vidhīyatām //

bharadvājaḥ kaṭhaṃ prāha adhīṣva yad abhīpsitam
purāṇaṃ smṛtayo vedā dharmasthānāny anekaśaḥ //

sarvaṃ vedmi mahāprājña ruciraṃ vada mā ciram
kulīno dharmanirato guruśuśrūṣaṇe rataḥ
abhimānī śrutadharaḥ śiṣyaḥ puṇyair avāpyate //

adhyāpayasva bho brahmañ śiṣyaṃ māṃ vītakalmaṣam
śuśrūṣaṇarataṃ bhaktaṃ kulīnaṃ satyavādinam //

tathety uktvā bharadvājaḥ prādād vidyām aśeṣataḥ
prāptavidyaḥ kaṭhaḥ prīto bharadvājam athābravīt //

iccheyaṃ dakṣiṇāṃ dātuṃ guro tava manaḥpriyām
vadasva durlabhaṃ vāpi guro tubhyaṃ namo 'stu te //

vidyāṃ prāpyāpi ye mohāt svaguroḥ pāritoṣikam
na prayacchanti nirayaṃ te yānty ācandratārakam //

gṛhāṇa kanyāṃ vidhivad bhāryāṃ kuru mama svasām
asyāṃ prītyā vartitavyaṃ yāceyaṃ dakṣiṇām imām //

bhrātṛvat putravac cāpi śiṣyaḥ syāt tu guroḥ sadā
guruś ca pitṛvac ca syāt saṃbandho 'tra kathaṃ bhavet //

madvākyaṃ kuru satyaṃ tvaṃ mamājñā tava dakṣiṇā
sarvaṃ smṛtvā kaṭhādya tvaṃ revatīṃ bhara tanmanāḥ //

tathety uktvā guror vākyāt kaṭho jagrāha pāṇinā
revatīṃ vidhivad dattāṃ tāṃ samīkṣya kaṭhas tv atha //

tatraiva pūjayām āsa deveśaṃ śaṃkaraṃ tadā
revatyā rūpasaṃpattyai śivaprītyai ca revatī //

surūpā cārusarvāṅgī na rūpeṇopamīyate
abhiṣekodakaṃ tatra revatyā yad viniḥsṛtam //

sābhavat tatra gaṅgāyāṃ tasmāt tannāmato nadī
revatīti samākhyātā rūpasaubhāgyadāyinī //

punar darbhaiś ca vividhair abhiṣekaṃ cakāra saḥ
puṇyarūpatvasaṃsiddhyai vidarbhā tad abhūn nadī //

śraddhayā saṃgame snātvā revatīgaṅgayor naraḥ
sarvapāpavinirmukto viṣṇuloke mahīyate //

tathā vidarbhāgautamyoḥ saṃgame śraddhayā mune
snānaṃ karoty asau yāti bhuktiṃ muktiṃ ca tatkṣaṇāt //

ubhayos tīrayos tatra tīrthānāṃ śatam uttamam
sarvapāpakṣayakaraṃ sarvasiddhipradāyakam //