Brahma Purana · Chapter 120

dhānyatīrtham iti khyātaṃ sarvakāmapradaṃ nṛṇām
subhikṣaṃ kṣemadaṃ puṃsāṃ sarvāpadvinivāraṇam //

oṣadhyaḥ somarājānaṃ patiṃ prāpya mudānvitāḥ
ūcuḥ sarvasya lokasya gaṅgāyāś cepsitaṃ vacaḥ //

vaidikī puṇyagāthāsti yāṃ vai vedavido viduḥ
bhūmiṃ sasyavatīṃ kaścin mātaraṃ mātṛsaṃmitām //

gaṅgāsamīpe yo dadyāt sarvakāmān avāpnuyāt
bhūmiṃ sasyavatīṃ gāś ca oṣadhīś ca mudānvitaḥ //

viṣṇubrahmeśarūpāya yo dadyād bhaktimān naraḥ
sarvaṃ tad akṣayaṃ vidyāt sarvakāmān avāpnuyāt //

oṣadhyaḥ somarājanyāḥ somaś cāpy oṣadhīpatiḥ
iti jñātvā brahmavida oṣadhīr yaḥ pradāsyati //

sarvān kāmān avāpnoti brahmaloke mahīyate
tā eva somarājanyāḥ prītāḥ procuḥ punaḥ punaḥ //

yo 'smān dadāti gaṅgāyāṃ taṃ rājan pārayāmasi
tvam uttamaś cauṣadhīśa tvadadhīnaṃ carācaram //

oṣadhayaḥ saṃvadante somena saha rājñā
yo 'smān dadāti viprebhyas taṃ rājan pārayāmasi //

vayaṃ ca brahmarūpiṇyaḥ prāṇarūpiṇya eva ca
yo 'smān dadāti viprebhyas taṃ rājan pārayāmasi //

asmān dadāti yo nityaṃ brāhmaṇebhyo jitavrataḥ
upāstir asti sāsmākaṃ taṃ rājan pārayāmasi //

sthāvaraṃ jaṅgamaṃ kiṃcid asmābhir vyāpṛtaṃ jagat
yo 'smān dadāti viprebhyas taṃ rājan pārayāmasi //

havyaṃ kavyaṃ yad amṛtaṃ yat kiṃcid upabhujyate
tadgarīyaś ca yo dadyāt taṃ rājan pārayāmasi //

ity etāṃ vaidikīṃ gāthāṃ yaḥ śṛṇoti smareta vā
paṭhate bhaktim āpannas taṃ rājan pārayāmasi //

yatraiṣā paṭhitā gāthā somena saha rājñā
gaṅgātīre cauṣadhībhir dhānyatīrthaṃ tad ucyate //

tataḥ prabhṛti tat tīrtham auṣadhyaṃ saumyam eva ca
amṛtaṃ vedagāthaṃ ca mātṛtīrthaṃ tathaiva ca //

eṣu snānaṃ japo homo dānaṃ ca pitṛtarpaṇam
annadānaṃ tu yaḥ kuryāt tad ānantyāya kalpate //

ṣaṭśatādhikasāhasraṃ tīrthānāṃ tīrayor dvayoḥ
sarvapāpanihantṝṇāṃ sarvasaṃpadvivardhanam //