Brahma Purana · Chapter 119

somatīrtham iti khyātaṃ tad apy uktaṃ mahātmabhiḥ
tatra snānena dānena somapānaphalaṃ labhet //

jagatāṃ mātaraḥ pūrvam oṣadhyo jīvasaṃmatāḥ
mamāpi mātaro devyaḥ pūrvāsāṃ pūrvavattarāḥ //

āsu pratiṣṭhito dharmaḥ svādhyāyo yajñakarma ca
ābhir eva dhṛtaṃ sarvaṃ trailokyaṃ sacarācaram //

aśeṣarogopaśamo bhavaty ābhir asaṃśayam
annam etābhir eva syād aśeṣaprāṇarakṣaṇam
atrauṣadhyo jagadvandyā mām ūcur anahaṃkṛtāḥ //

asmākaṃ tvaṃ patiṃ dehi rājānaṃ surasattama //

tac chrutvā vacanaṃ tāsāṃ mayoktā oṣadhīr idam
patiṃ prāpsyatha sarvāś ca rājānaṃ prītivardhanam //

rājānam iti tac chrutvā tā mām ūcuḥ punar mune
gantavyaṃ kva punaś coktā gautamīṃ yāntu mātaraḥ //

tuṣṭāyām atha tasyāṃ vo rājā syāl lokapūjitaḥ
tāś ca gatvā muniśreṣṭha tuṣṭuvur gautamīṃ nadīm //

kiṃ vākariṣyan bhavavartino janā nānāghasaṃghābhibhavāc ca duḥkhitāḥ
na cāgamiṣyad bhavatī bhuvaṃ cet puṇyodake gautami śaṃbhukānte

ko vetti bhāgyaṃ naradehabhājāṃ mahīgatānāṃ saritām adhīśe
eṣāṃ mahāpātakasaṃghahantrī tvam amba gaṅge sulabhā sadaiva

na te vibhūtiṃ nanu vetti ko 'pi trailokyavandye jagadamba gaṅge
gaurīsamāliṅgitavigraho 'pi dhatte smarāriḥ śirasāpi yat tvām

namo 'stu te mātar abhīṣṭadāyini namo 'stu te brahmamaye 'ghanāśini
namo 'stu te viṣṇupadābjaniḥsṛte namo 'stu te śaṃbhujaṭāviniḥsṛte

ity evaṃ stuvatām īśā kiṃ dadāmīty avocata //

patiṃ dehi jaganmātā rājānam atitejasam //

tadovāca nadī gaṅgā oṣadhīs tā idaṃ vacaḥ //

ahaṃ cāmṛtarūpāsmi oṣadhyo mātaro 'mṛtāḥ
tādṛśaṃ cāmṛtātmānaṃ patiṃ somaṃ dadāmi vaḥ //

devāś ca ṛṣayo vākyaṃ menire soma eva ca
oṣadhyaś cāpi tad vākyaṃ tato jagmuḥ svam ālayam //

yatra cāpur mahauṣadhyo rājānam amṛtātmakam
somaṃ samastasaṃtāpa pāpasaṃghanivārakam //

somatīrthaṃ tu tat khyātaṃ somapānaphalapradam
tatra snānena dānena pitaraḥ svargam āpnuyuḥ //

ya idaṃ śṛṇuyān nityaṃ paṭhed vā bhaktitaḥ smaret
dīrgham āyur avāpnoti sa putrī dhanavān bhavet //