બ્રહ્મ પુરાણ · અધ્યાય 120

ધાન્યતીર્થમ્ ઇતિ ખ્યાતં સર્વકામપ્રદં નૃણામ્
સુભિક્ષં ક્ષેમદં પુંસાં સર્વાપદ્વિનિવારણમ્ ॥

ઓષધ્યઃ સોમરાજાનં પતિં પ્રાપ્ય મુદાન્વિતાઃ
ઊચુઃ સર્વસ્ય લોકસ્ય ગઙ્ગાયાશ્ ચેપ્સિતં વચઃ ॥

વૈદિકી પુણ્યગાથાસ્તિ યાં વૈ વેદવિદો વિદુઃ
ભૂમિં સસ્યવતીં કશ્ચિન્ માતરં માતૃસંમિતામ્ ॥

ગઙ્ગાસમીપે યો દદ્યાત્ સર્વકામાન્ અવાપ્નુયાત્
ભૂમિં સસ્યવતીં ગાશ્ ચ ઓષધીશ્ ચ મુદાન્વિતઃ ॥

વિષ્ણુબ્રહ્મેશરૂપાય યો દદ્યાદ્ ભક્તિમાન્ નરઃ
સર્વં તદ્ અક્ષયં વિદ્યાત્ સર્વકામાન્ અવાપ્નુયાત્ ॥

ઓષધ્યઃ સોમરાજન્યાઃ સોમશ્ ચાપ્ય્ ઓષધીપતિઃ
ઇતિ જ્ઞાત્વા બ્રહ્મવિદ ઓષધીર્ યઃ પ્રદાસ્યતિ ॥

સર્વાન્ કામાન્ અવાપ્નોતિ બ્રહ્મલોકે મહીયતે
તા એવ સોમરાજન્યાઃ પ્રીતાઃ પ્રોચુઃ પુનઃ પુનઃ ॥

યો ઽસ્માન્ દદાતિ ગઙ્ગાયાં તં રાજન્ પારયામસિ
ત્વમ્ ઉત્તમશ્ ચૌષધીશ ત્વદધીનં ચરાચરમ્ ॥

ઓષધયઃ સંવદન્તે સોમેન સહ રાજ્ઞા
યો ઽસ્માન્ દદાતિ વિપ્રેભ્યસ્ તં રાજન્ પારયામસિ ॥

વયં ચ બ્રહ્મરૂપિણ્યઃ પ્રાણરૂપિણ્ય એવ ચ
યો ઽસ્માન્ દદાતિ વિપ્રેભ્યસ્ તં રાજન્ પારયામસિ ॥

અસ્માન્ દદાતિ યો નિત્યં બ્રાહ્મણેભ્યો જિતવ્રતઃ
ઉપાસ્તિર્ અસ્તિ સાસ્માકં તં રાજન્ પારયામસિ ॥

સ્થાવરં જઙ્ગમં કિંચિદ્ અસ્માભિર્ વ્યાપૃતં જગત્
યો ઽસ્માન્ દદાતિ વિપ્રેભ્યસ્ તં રાજન્ પારયામસિ ॥

હવ્યં કવ્યં યદ્ અમૃતં યત્ કિંચિદ્ ઉપભુજ્યતે
તદ્ગરીયશ્ ચ યો દદ્યાત્ તં રાજન્ પારયામસિ ॥

ઇત્ય્ એતાં વૈદિકીં ગાથાં યઃ શૃણોતિ સ્મરેત વા
પઠતે ભક્તિમ્ આપન્નસ્ તં રાજન્ પારયામસિ ॥

યત્રૈષા પઠિતા ગાથા સોમેન સહ રાજ્ઞા
ગઙ્ગાતીરે ચૌષધીભિર્ ધાન્યતીર્થં તદ્ ઉચ્યતે ॥

તતઃ પ્રભૃતિ તત્ તીર્થમ્ ઔષધ્યં સૌમ્યમ્ એવ ચ
અમૃતં વેદગાથં ચ માતૃતીર્થં તથૈવ ચ ॥

એષુ સ્નાનં જપો હોમો દાનં ચ પિતૃતર્પણમ્
અન્નદાનં તુ યઃ કુર્યાત્ તદ્ આનન્ત્યાય કલ્પતે ॥

ષટ્શતાધિકસાહસ્રં તીર્થાનાં તીરયોર્ દ્વયોઃ
સર્વપાપનિહન્તૄણાં સર્વસંપદ્વિવર્ધનમ્ ॥