બ્રહ્મ પુરાણ · અધ્યાય 119

સોમતીર્થમ્ ઇતિ ખ્યાતં તદ્ અપ્ય્ ઉક્તં મહાત્મભિઃ
તત્ર સ્નાનેન દાનેન સોમપાનફલં લભેત્ ॥

જગતાં માતરઃ પૂર્વમ્ ઓષધ્યો જીવસંમતાઃ
મમાપિ માતરો દેવ્યઃ પૂર્વાસાં પૂર્વવત્તરાઃ ॥

આસુ પ્રતિષ્ઠિતો ધર્મઃ સ્વાધ્યાયો યજ્ઞકર્મ ચ
આભિર્ એવ ધૃતં સર્વં ત્રૈલોક્યં સચરાચરમ્ ॥

અશેષરોગોપશમો ભવત્ય્ આભિર્ અસંશયમ્
અન્નમ્ એતાભિર્ એવ સ્યાદ્ અશેષપ્રાણરક્ષણમ્
અત્રૌષધ્યો જગદ્વન્દ્યા મામ્ ઊચુર્ અનહંકૃતાઃ ॥

અસ્માકં ત્વં પતિં દેહિ રાજાનં સુરસત્તમ ॥

તચ્ છ્રુત્વા વચનં તાસાં મયોક્તા ઓષધીર્ ઇદમ્
પતિં પ્રાપ્સ્યથ સર્વાશ્ ચ રાજાનં પ્રીતિવર્ધનમ્ ॥

રાજાનમ્ ઇતિ તચ્ છ્રુત્વા તા મામ્ ઊચુઃ પુનર્ મુને
ગન્તવ્યં ક્વ પુનશ્ ચોક્તા ગૌતમીં યાન્તુ માતરઃ ॥

તુષ્ટાયામ્ અથ તસ્યાં વો રાજા સ્યાલ્ લોકપૂજિતઃ
તાશ્ ચ ગત્વા મુનિશ્રેષ્ઠ તુષ્ટુવુર્ ગૌતમીં નદીમ્ ॥

કિં વાકરિષ્યન્ ભવવર્તિનો જના નાનાઘસંઘાભિભવાચ્ ચ દુઃખિતાઃ
ન ચાગમિષ્યદ્ ભવતી ભુવં ચેત્ પુણ્યોદકે ગૌતમિ શંભુકાન્તે

કો વેત્તિ ભાગ્યં નરદેહભાજાં મહીગતાનાં સરિતામ્ અધીશે
એષાં મહાપાતકસંઘહન્ત્રી ત્વમ્ અમ્બ ગઙ્ગે સુલભા સદૈવ

ન તે વિભૂતિં નનુ વેત્તિ કો ઽપિ ત્રૈલોક્યવન્દ્યે જગદમ્બ ગઙ્ગે
ગૌરીસમાલિઙ્ગિતવિગ્રહો ઽપિ ધત્તે સ્મરારિઃ શિરસાપિ યત્ ત્વામ્

નમો ઽસ્તુ તે માતર્ અભીષ્ટદાયિનિ નમો ઽસ્તુ તે બ્રહ્મમયે ઽઘનાશિનિ
નમો ઽસ્તુ તે વિષ્ણુપદાબ્જનિઃસૃતે નમો ઽસ્તુ તે શંભુજટાવિનિઃસૃતે

ઇત્ય્ એવં સ્તુવતામ્ ઈશા કિં દદામીત્ય્ અવોચત ॥

પતિં દેહિ જગન્માતા રાજાનમ્ અતિતેજસમ્ ॥

તદોવાચ નદી ગઙ્ગા ઓષધીસ્ તા ઇદં વચઃ ॥

અહં ચામૃતરૂપાસ્મિ ઓષધ્યો માતરો ઽમૃતાઃ
તાદૃશં ચામૃતાત્માનં પતિં સોમં દદામિ વઃ ॥

દેવાશ્ ચ ઋષયો વાક્યં મેનિરે સોમ એવ ચ
ઓષધ્યશ્ ચાપિ તદ્ વાક્યં તતો જગ્મુઃ સ્વમ્ આલયમ્ ॥

યત્ર ચાપુર્ મહૌષધ્યો રાજાનમ્ અમૃતાત્મકમ્
સોમં સમસ્તસંતાપ પાપસંઘનિવારકમ્ ॥

સોમતીર્થં તુ તત્ ખ્યાતં સોમપાનફલપ્રદમ્
તત્ર સ્નાનેન દાનેન પિતરઃ સ્વર્ગમ્ આપ્નુયુઃ ॥

ય ઇદં શૃણુયાન્ નિત્યં પઠેદ્ વા ભક્તિતઃ સ્મરેત્
દીર્ઘમ્ આયુર્ અવાપ્નોતિ સ પુત્રી ધનવાન્ ભવેત્ ॥