Brahma Purana · Chapter 114

avighnaṃ tīrtham ākhyātaṃ sarvavighnavināśanam
tatrāpi vṛttam ākhyāsye śṛṇu nārada bhaktitaḥ //

devasattre pravṛtte tu gautamyāś cottare taṭe
samāptir naiva sattrasya saṃjātā vighnadoṣataḥ //

tataḥ suragaṇāḥ sarve mām avocan hariṃ tadā
tato dhyānagato 'haṃ tān avocaṃ vīkṣya kāraṇam //

vināyakakṛtair vighnair naitat sattraṃ samāpyate
tasmāt stuvantu te sarve ādidevaṃ vināyakam //

tathety uktvā suragaṇāḥ snātvā te gautamītaṭe
astuvan bhaktito devā ādidevaṃ gaṇeśvaram //

yaḥ sarvakāryeṣu sadā surāṇām apīśaviṣṇvambujasaṃbhavānām
pūjyo namasyaḥ paricintanīyas taṃ vighnarājaṃ śaraṇaṃ vrajāmaḥ

na vighnarājena samo 'sti kaścid devo manovāñchitasaṃpradātā
niścitya caitat tripurāntako 'pi taṃ pūjayām āsa vadhe purāṇām

karotu so 'smākam avighnam asmin mahākratau satvaram āmbikeyaḥ
dhyātena yenākhiladehabhājāṃ pūrṇā bhaviṣyanti manobhilāṣāḥ

mahotsavo 'bhūd akhilasya devyā jātaḥ sutaś cintitamātra eva
ato 'vadan surasaṃghāḥ kṛtārthāḥ sadyojātaṃ vighnarājaṃ namantaḥ

yo mātur utsaṅgagato 'tha mātrā nivāryamāṇo 'pi balāc ca candram
saṃgopayām āsa pitur jaṭāsu gaṇādhināthasya vinoda eṣaḥ

papau stanaṃ mātur athāpi tṛpto yo bhrātṛmātsaryakaṣāyabuddhiḥ
lambodaras tvaṃ bhava vighnarājo lambodaraṃ nāma cakāra śaṃbhuḥ

saṃveṣṭito devagaṇair maheśaḥ pravartatāṃ nṛtyam itīty uvāca
saṃtoṣito nūpurarāvamātrād gaṇeśvaratve 'bhiṣiṣeca putram

yo vighnapāśaṃ ca kareṇa bibhrat skandhe kuṭhāraṃ ca tathā pareṇa
apūjito vighnam atho 'pi mātuḥ karoti ko vighnapateḥ samo 'nyaḥ

dharmārthakāmādiṣu pūrvapūjyo devāsuraiḥ pūjyata eva nityam
yasyārcanaṃ naiva vināśam asti taṃ pūrvapūjyaṃ prathamaṃ namāmi

yasyārcanāt prārthanayānurūpāṃ dṛṣṭvā tu sarvasya phalasya siddhim
svatantrasāmarthyakṛtātigarvaṃ bhrātṛpriyaṃ tv ākhurathaṃ tam īḍe

yo mātaraṃ sarasair nṛtyagītais tathābhilāṣair akhilair vinodaiḥ
saṃtoṣayām āsa tadātituṣṭaṃ taṃ śrīgaṇeśaṃ śaraṇaṃ prapadye

suropakārair asuraiś ca yuddhaiḥ stotrair namaskāraparaiś ca mantraiḥ
pitṛprasādena sadā samṛddhaṃ taṃ śrīgaṇeśaṃ śaraṇaṃ prapadye

jaye purāṇām akarot pratīpaṃ pitrāpi harṣāt pratipūjito yaḥ
nirvighnatāṃ cāpi punaś cakāra tasmai gaṇeśāya namaskaromi

iti stutaḥ suragaṇair vighneśaḥ prāha tān punaḥ //

ito nirvighnatā sattre mattaḥ syād asurāriṇaḥ //

devasattre nivṛtte tu gaṇeśaḥ prāha tān surān //

stotreṇānena ye bhaktyā māṃ stoṣyanti yatavratāḥ
teṣāṃ dāridryaduḥkhāni na bhaveyuḥ kadācana //

atra ye bhaktitaḥ snānaṃ dānaṃ kuryur atandritāḥ
teṣāṃ sarvāṇi kāryāṇi bhaveyur iti manyatām //

tadvākyasamakālaṃ tu tathety ūcuḥ surā api
nivṛtte tu makhe tasmin surā jagmuḥ svam ālayam //

tataḥ prabhṛti tat tīrtham avighnam iti gadyate
sarvakāmapradaṃ puṃsāṃ sarvavighnavināśanam //