બ્રહ્મ પુરાણ · અધ્યાય 114

અવિઘ્નં તીર્થમ્ આખ્યાતં સર્વવિઘ્નવિનાશનમ્
તત્રાપિ વૃત્તમ્ આખ્યાસ્યે શૃણુ નારદ ભક્તિતઃ ॥

દેવસત્ત્રે પ્રવૃત્તે તુ ગૌતમ્યાશ્ ચોત્તરે તટે
સમાપ્તિર્ નૈવ સત્ત્રસ્ય સંજાતા વિઘ્નદોષતઃ ॥

તતઃ સુરગણાઃ સર્વે મામ્ અવોચન્ હરિં તદા
તતો ધ્યાનગતો ઽહં તાન્ અવોચં વીક્ષ્ય કારણમ્ ॥

વિનાયકકૃતૈર્ વિઘ્નૈર્ નૈતત્ સત્ત્રં સમાપ્યતે
તસ્માત્ સ્તુવન્તુ તે સર્વે આદિદેવં વિનાયકમ્ ॥

તથેત્ય્ ઉક્ત્વા સુરગણાઃ સ્નાત્વા તે ગૌતમીતટે
અસ્તુવન્ ભક્તિતો દેવા આદિદેવં ગણેશ્વરમ્ ॥

યઃ સર્વકાર્યેષુ સદા સુરાણામ્ અપીશવિષ્ણ્વમ્બુજસંભવાનામ્
પૂજ્યો નમસ્યઃ પરિચિન્તનીયસ્ તં વિઘ્નરાજં શરણં વ્રજામઃ

ન વિઘ્નરાજેન સમો ઽસ્તિ કશ્ચિદ્ દેવો મનોવાઞ્છિતસંપ્રદાતા
નિશ્ચિત્ય ચૈતત્ ત્રિપુરાન્તકો ઽપિ તં પૂજયામ્ આસ વધે પુરાણામ્

કરોતુ સો ઽસ્માકમ્ અવિઘ્નમ્ અસ્મિન્ મહાક્રતૌ સત્વરમ્ આમ્બિકેયઃ
ધ્યાતેન યેનાખિલદેહભાજાં પૂર્ણા ભવિષ્યન્તિ મનોભિલાષાઃ

મહોત્સવો ઽભૂદ્ અખિલસ્ય દેવ્યા જાતઃ સુતશ્ ચિન્તિતમાત્ર એવ
અતો ઽવદન્ સુરસંઘાઃ કૃતાર્થાઃ સદ્યોજાતં વિઘ્નરાજં નમન્તઃ

યો માતુર્ ઉત્સઙ્ગગતો ઽથ માત્રા નિવાર્યમાણો ઽપિ બલાચ્ ચ ચન્દ્રમ્
સંગોપયામ્ આસ પિતુર્ જટાસુ ગણાધિનાથસ્ય વિનોદ એષઃ

પપૌ સ્તનં માતુર્ અથાપિ તૃપ્તો યો ભ્રાતૃમાત્સર્યકષાયબુદ્ધિઃ
લમ્બોદરસ્ ત્વં ભવ વિઘ્નરાજો લમ્બોદરં નામ ચકાર શંભુઃ

સંવેષ્ટિતો દેવગણૈર્ મહેશઃ પ્રવર્તતાં નૃત્યમ્ ઇતીત્ય્ ઉવાચ
સંતોષિતો નૂપુરરાવમાત્રાદ્ ગણેશ્વરત્વે ઽભિષિષેચ પુત્રમ્

યો વિઘ્નપાશં ચ કરેણ બિભ્રત્ સ્કન્ધે કુઠારં ચ તથા પરેણ
અપૂજિતો વિઘ્નમ્ અથો ઽપિ માતુઃ કરોતિ કો વિઘ્નપતેઃ સમો ઽન્યઃ

ધર્માર્થકામાદિષુ પૂર્વપૂજ્યો દેવાસુરૈઃ પૂજ્યત એવ નિત્યમ્
યસ્યાર્ચનં નૈવ વિનાશમ્ અસ્તિ તં પૂર્વપૂજ્યં પ્રથમં નમામિ

યસ્યાર્ચનાત્ પ્રાર્થનયાનુરૂપાં દૃષ્ટ્વા તુ સર્વસ્ય ફલસ્ય સિદ્ધિમ્
સ્વતન્ત્રસામર્થ્યકૃતાતિગર્વં ભ્રાતૃપ્રિયં ત્વ્ આખુરથં તમ્ ઈડે

યો માતરં સરસૈર્ નૃત્યગીતૈસ્ તથાભિલાષૈર્ અખિલૈર્ વિનોદૈઃ
સંતોષયામ્ આસ તદાતિતુષ્ટં તં શ્રીગણેશં શરણં પ્રપદ્યે

સુરોપકારૈર્ અસુરૈશ્ ચ યુદ્ધૈઃ સ્તોત્રૈર્ નમસ્કારપરૈશ્ ચ મન્ત્રૈઃ
પિતૃપ્રસાદેન સદા સમૃદ્ધં તં શ્રીગણેશં શરણં પ્રપદ્યે

જયે પુરાણામ્ અકરોત્ પ્રતીપં પિત્રાપિ હર્ષાત્ પ્રતિપૂજિતો યઃ
નિર્વિઘ્નતાં ચાપિ પુનશ્ ચકાર તસ્મૈ ગણેશાય નમસ્કરોમિ

ઇતિ સ્તુતઃ સુરગણૈર્ વિઘ્નેશઃ પ્રાહ તાન્ પુનઃ ॥

ઇતો નિર્વિઘ્નતા સત્ત્રે મત્તઃ સ્યાદ્ અસુરારિણઃ ॥

દેવસત્ત્રે નિવૃત્તે તુ ગણેશઃ પ્રાહ તાન્ સુરાન્ ॥

સ્તોત્રેણાનેન યે ભક્ત્યા માં સ્તોષ્યન્તિ યતવ્રતાઃ
તેષાં દારિદ્ર્યદુઃખાનિ ન ભવેયુઃ કદાચન ॥

અત્ર યે ભક્તિતઃ સ્નાનં દાનં કુર્યુર્ અતન્દ્રિતાઃ
તેષાં સર્વાણિ કાર્યાણિ ભવેયુર્ ઇતિ મન્યતામ્ ॥

તદ્વાક્યસમકાલં તુ તથેત્ય્ ઊચુઃ સુરા અપિ
નિવૃત્તે તુ મખે તસ્મિન્ સુરા જગ્મુઃ સ્વમ્ આલયમ્ ॥

તતઃ પ્રભૃતિ તત્ તીર્થમ્ અવિઘ્નમ્ ઇતિ ગદ્યતે
સર્વકામપ્રદં પુંસાં સર્વવિઘ્નવિનાશનમ્ ॥