Brahma Purana · Chapter 113

idam apy aparaṃ tīrthaṃ devānām api durlabham
brahmatīrtham iti khyātaṃ bhuktimuktipradaṃ nṛṇām //

sthiteṣu devasainyeṣu praviṣṭeṣu rasātalam
daityeṣu ca muniśreṣṭha tathā mātṛṣu tān anu //

madīyaṃ pañcamaṃ vaktraṃ gardabhākṛti bhīṣaṇam
tad vaktraṃ devasainyeṣu mayi tiṣṭhaty uvāca ha //

he daityāḥ kiṃ palāyante na bhayaṃ vo 'stu satvaram
āgacchantu surān sarvān bhakṣayiṣye kṣaṇād iti //

nivārayantaṃ mām evaṃ bhakṣaṇāyodyataṃ tathā
taṃ dṛṣṭvā vibudhāḥ sarve vitrastā viṣṇum abruvan //

trāhi viṣṇo jagannātha brahmaṇo 'sya mukhaṃ luna
cakradhṛg vibudhān āha cchedmi cakreṇa vai śiraḥ //

kiṃ tu tac chinnam evedaṃ saṃharet sacarācaram
mantraṃ brūmo 'tra vibudhāḥ śrūyatāṃ sarvam eva hi //

trinetraḥ kaśiraś chettā sa ca dhatte na saṃśayaḥ
mayā ca śaṃbhuḥ sarvaiś ca stutaḥ proktas tathaiva ca //

yāgaḥ kṣaṇī dṛṣṭaphale 'samarthaḥ sa naiva kartuḥ phalatīti matvā
phalasya dāne pratibhūr jaṭīti niścitya lokaḥ pratikarma yātaḥ

tataḥ sureśaḥ saṃtuṣṭo devānāṃ kāryasiddhaye
lokānām upakārārthaṃ tathety āha surān prati //

tadvaktraṃ pāparūpaṃ yad bhīṣaṇaṃ lomaharṣaṇam
nikṛtya nakhaśastraiś ca kva sthāpyaṃ cety athābravīt //

tatrelā vibudhān āha nāhaṃ voḍhuṃ śiraḥ kṣamā
rasātalam atho yāsye udadhiś cāpy athābravīt //

śoṣaṃ yāsye kṣaṇād eva punaś cocuḥ śivaṃ surāḥ
tvayaivaitad brahmaśiro dhāryaṃ lokānukampayā //

acchede jagatāṃ nāśaś chede doṣaś ca tādṛśaḥ
evaṃ vimṛśya someśo dadhāra kaśiras tadā //

tad dṛṣṭvā duṣkaraṃ karma gautamīṃ prāpya pāvanīm
astuvañ jagatām īśaṃ praṇayād bhaktitaḥ surāḥ //

deveṣv amitraṃ kaśiro 'tibhīmaṃ tān bhakṣaṇāyopagataṃ nikṛtya
nakhāgrasūcyā śakalendumaulis tyāge 'pi doṣāt kṛpayānudhatte

tatra te vibudhāḥ sarve sthitā ye brahmaṇo 'ntike
tuṣṭuvur vibudheśānaṃ karma dṛṣṭvātidaivatam //

tataḥ prabhṛti tat tīrthaṃ brahmatīrtham iti śrutam
adyāpi brahmaṇo rūpaṃ caturmukham avasthitam //

śiromātraṃ tu yaḥ paśyet sa gacched brahmaṇaḥ padam
yatra sthitvā svayaṃ rudro lūnavān brahmaṇaḥ śiraḥ //

rudratīrthaṃ tad eva syāt tatra sākṣād divākaraḥ
devānāṃ ca svarūpeṇa sthito yasmāt tad uttamam //

sauryaṃ tīrthaṃ tad ākhyātaṃ sarvakratuphalapradam
tatra snātvā raviṃ dṛṣṭvā punarjanma na vidyate //

mahādevena yac chinnaṃ brahmaṇaḥ pañcamaṃ śiraḥ
kṣetre 'vimukte saṃsthāpya devatānāṃ hitaṃ kṛtam //

brahmatīrthe śiromātraṃ yo dṛṣṭvā gautamītaṭe
kṣetre 'vimukte tasyaiva sthāpitaṃ yo 'nupaśyati
kapālaṃ brahmaṇaḥ puṇyaṃ brahmahā pūtatāṃ vrajet //