Brahma Purana · Chapter 11

āyoḥ putrāś ca te pañca sarve vīrā mahārathāḥ
svarbhānutanayāyāṃ ca prabhāyāṃ jajñire nṛpāḥ //

nahuṣaḥ prathamaṃ jajñe vṛddhaśarmā tataḥ param
rambho rajir anenāś ca triṣu lokeṣu viśrutāḥ //

rajiḥ putraśatānīha janayām āsa pañca vai
rājeyam iti vikhyātaṃ kṣatram indrabhayāvaham //

yatra daivāsure yuddhe samutpanne sudāruṇe
devāś caivāsurāś caiva pitāmaham athābruvan //

āvayor bhagavan yuddhe ko vijetā bhaviṣyati
brūhi naḥ sarvabhūteśa śrotum icchāma tattvataḥ //

yeṣām arthāya saṃgrāme rajir āttāyudhaḥ prabhuḥ
yotsyate te vijeṣyanti trīṃl lokān nātra saṃśayaḥ //

yato rajir dhṛtis tatra śrīś ca tatra yato dhṛtiḥ
yato dhṛtiś ca śrīś caiva dharmas tatra jayas tathā //

te devā dānavāḥ prītā devenoktā rajiṃ tadā
abhyayur jayam icchanto vṛṇvānās taṃ nararṣabham //

sa hi svarbhānudauhitraḥ prabhāyāṃ samapadyata
rājā paramatejasvī somavaṃśavivardhanaḥ //

te hṛṣṭamanasaḥ sarve rajiṃ vai devadānavāḥ
ūcur asmajjayāya tvaṃ gṛhāṇa varakārmukam //

athovāca rajis tatra tayor vai devadaityayoḥ
arthajñaḥ svārtham uddiśya yaśaḥ svaṃ ca prakāśayan //

yadi daityagaṇān sarvāñ jitvā vīryeṇa vāsavaḥ
indro bhavāmi dharmeṇa tato yotsyāmi saṃyuge //

devāḥ prathamato viprāḥ pratīyur hṛṣṭamānasāḥ
evaṃ yatheṣṭaṃ nṛpate kāmaḥ saṃpadyatāṃ tava //

śrutvā suragaṇānāṃ tu vākyaṃ rājā rajis tadā
papracchāsuramukhyāṃs tu yathā devān apṛcchata //

dānavā darpasaṃpūrṇāḥ svārtham evāvagamya ha
pratyūcus taṃ nṛpavaraṃ sābhimānam idaṃ vacaḥ //

asmākam indraḥ prahrādo yasyārthe vijayāmahe
asmiṃs tu samare rājaṃs tiṣṭha tvaṃ rājasattama //

sa tatheti bruvann eva devair apy aticoditaḥ
bhaviṣyasīndro jitvainaṃ devair uktas tu pārthivaḥ //

jaghāna dānavān sarvān ye 'vadhyā vajrapāṇinaḥ
sa vipranaṣṭāṃ devānāṃ paramaśrīḥ śriyaṃ vaśī //

nihatya dānavān sarvān ājahāra rajiḥ prabhuḥ
tato rajiṃ mahāvīryaṃ devaiḥ saha śatakratuḥ //

rajiputro 'ham ity uktvā punar evābravīd vacaḥ
indro 'si tāta devānāṃ sarveṣāṃ nātra saṃśayaḥ //

yasyāham indraḥ putras te khyātiṃ yāsyāmi karmabhiḥ
sa tu śakravacaḥ śrutvā vañcitas tena māyayā //

tathaivety abravīd rājā prīyamāṇaḥ śatakratum
tasmiṃs tu devaiḥ sadṛśo divaṃ prāpte mahīpatau //

dāyādyam indrād ājahrū rājyaṃ tattanayā rajeḥ
pañca putraśatāny asya tad vai sthānaṃ śatakratoḥ //

samākrāmanta bahudhā svargalokaṃ triviṣṭapam
te yadā tu svasaṃmūḍhā rāgonmattā vidharmiṇaḥ //

brahmadviṣaś ca saṃvṛttā hatavīryaparākramāḥ
tato lebhe svam aiśvaryam indraḥ sthānaṃ tathottamam //

hatvā rajisutān sarvān kāmakrodhaparāyaṇān
ya idaṃ cyāvanaṃ sthānāt pratiṣṭhānaṃ śatakratoḥ
śṛṇuyād dhārayed vāpi na sa daurgatyam āpnuyāt //

rambho 'napatyas tv āsīc ca vaṃśaṃ vakṣyāmy anenasaḥ
anenasaḥ suto rājā pratikṣatro mahāyaśāḥ //

pratikṣatrasutaś cāsīt saṃjayo nāma viśrutaḥ
saṃjayasya jayaḥ putro vijayas tasya cātmajaḥ //

vijayasya kṛtiḥ putras tasya haryatvataḥ sutaḥ
haryatvatasuto rājā sahadevaḥ pratāpavān //

sahadevasya dharmātmā nadīna iti viśrutaḥ
nadīnasya jayatseno jayatsenasya saṃkṛtiḥ //

saṃkṛter api dharmātmā kṣatravṛddho mahāyaśāḥ
anenasaḥ samākhyātāḥ kṣatravṛddhasya cāparaḥ //

kṣatravṛddhātmajas tatra sunahotro mahāyaśāḥ
sunahotrasya dāyādās trayaḥ paramadhārmikāḥ //

kāśaḥ śalaś ca dvāv etau tathā gṛtsamadaḥ prabhuḥ
putro gṛtsamadasyāpi śunako yasya śaunakaḥ //

brāhmaṇāḥ kṣatriyāś caiva vaiśyāḥ śūdrās tathaiva ca
śalātmaja ārṣṭiseṇas tanayas tasya kāśyapaḥ //

kāśasya kāśipo rājā putro dīrghatapās tathā
dhanus tu dīrghatapaso vidvān dhanvantaris tataḥ //

tapaso 'nte sumahato jāto vṛddhasya dhīmataḥ
punar dhanvantarir devo mānuṣeṣv iha janmani //

tasya gehe samutpanno devo dhanvantaris tadā
kāśirājo mahārājaḥ sarvarogapraṇāśanaḥ //

āyurvedaṃ bharadvājāt prāpyeha sa bhiṣakkriyaḥ
tam aṣṭadhā punar vyasya śiṣyebhyaḥ pratyapādayat //

dhanvantares tu tanayaḥ ketumān iti viśrutaḥ
atha ketumataḥ putro vīro bhīmarathaḥ smṛtaḥ //

putro bhīmarathasyāpi divodāsaḥ prajeśvaraḥ
divodāsas tu dharmātmā vārāṇasyadhipo 'bhavat //

etasminn eva kāle tu purīṃ vārāṇasīṃ dvijāḥ
śūnyāṃ niveśayām āsa kṣemako nāma rākṣasaḥ //

śaptā hi sā matimatā nikumbhena mahātmanā
śūnyā varṣasahasraṃ vai bhavitrī tu na saṃśayaḥ //

tasyāṃ hi śaptamātrāyāṃ divodāsaḥ prajeśvaraḥ
viṣayānte purīṃ ramyāṃ gomatyāṃ saṃnyaveśayat //

bhadraśreṇyasya pūrvaṃ tu purī vārāṇasī abhūt
bhadraśreṇyasya putrāṇāṃ śatam uttamadhanvinām //

hatvā niveśayām āsa divodāso narādhipaḥ
bhadraśreṇyasya tad rājyaṃ hṛtaṃ yena balīyasā //

bhadraśreṇyasya putras tu durdamo nāma viśrutaḥ
divodāsena bāleti ghṛṇayā sa visarjitaḥ //

haihayasya tu dāyādyaṃ hṛtavān vai mahīpatiḥ
ājahre pitṛdāyādyaṃ divodāsahṛtaṃ balāt //

bhadraśreṇyasya putreṇa durdamena mahātmanā
vairasyānto mahābhāgāḥ kṛtaś cātmīyatejasā //

divodāsād dṛṣadvatyāṃ vīro jajñe pratardanaḥ
tena bālena putreṇa prahṛtaṃ tu punar balam //

pratardanasya putrau dvau vatsabhargau suviśrutau
vatsaputro hy alarkas tu saṃnatis tasya cātmajaḥ //

alarkas tasya putras tu brahmaṇyaḥ satyasaṃgaraḥ
alarkaṃ prati rājarṣiṃ śloko gītaḥ purātanaiḥ //

ṣaṣṭir varṣasahasrāṇi ṣaṣṭir varṣaśatāni ca
yuvā rūpeṇa saṃpannaḥ prāg āsīc ca kulodvahaḥ //

lopāmudrāprasādena paramāyur avāptavān
tasyāsīt sumahad rājyaṃ rūpayauvanaśālinaḥ //

śāpasyānte mahābāhur hatvā kṣemakarākṣasam
ramyāṃ niveśayām āsa purīṃ vārāṇasīṃ punaḥ //

saṃnater api dāyādaḥ sunītho nāma dhārmikaḥ
sunīthasya tu dāyādaḥ kṣemo nāma mahāyaśāḥ //

kṣemasya ketumān putraḥ suketus tasya cātmajaḥ
suketos tanayaś cāpi dharmaketur iti smṛtaḥ //

dharmaketos tu dāyādaḥ satyaketur mahārathaḥ
satyaketusutaś cāpi vibhur nāma prajeśvaraḥ //

ānartas tu vibhoḥ putraḥ sukumāraś ca tatsutaḥ
sukumārasya putras tu dhṛṣṭaketuḥ sudhārmikaḥ //

dhṛṣṭaketos tu dāyādo veṇuhotraḥ prajeśvaraḥ
veṇuhotrasutaś cāpi bhārgo nāma prajeśvaraḥ //

vatsasya vatsabhūmis tu bhārgabhūmis tu bhārgajaḥ
ete tv aṅgirasaḥ putrā jātā vaṃśe 'tha bhārgava //

brāhmaṇāḥ kṣatriyā vaiśyās trayaḥ putrāḥ sahasraśaḥ
ity ete kāśyapāḥ proktā nahuṣasya nibodhata //