Brahma Purana · Chapter 109

cakratīrtham iti khyātaṃ brahmahatyādināśanam
yatra cakreśvaro devaś cakram āpa yato hariḥ //

yatra viṣṇuḥ svayaṃ sthitvā cakrārthaṃ śaṃkaraṃ prabhuḥ
pūjayām āsa tat tīrthaṃ cakratīrtham udāhṛtam //

yasya śravaṇamātreṇa sarvapāpaiḥ pramucyate
dakṣakratau pravṛtte tu devānāṃ ca samāgame //

dakṣeṇa dūṣite deve śive śarve maheśvare
anāhvāne sureśasya dakṣacitte malīmase //

dākṣāyaṇyā śrute vākye anāhvānasya kāraṇe
ahalyāyāṃ coktavatyāṃ kupitābhūt sureśvarī //

pitaraṃ nāśaye pāpaṃ kṣameyaṃ na kathaṃcana
śṛṇvatī doṣavākyāni pitrā coktāni bhartari //

patyuḥ śṛṇvanti yā nindāṃ tāsāṃ pāpāvadhiḥ kutaḥ
yādṛśas tādṛśo vāpi patiḥ strīṇāṃ parā gatiḥ //

kiṃ punaḥ sakalādhīśo mahādevo jagadguruḥ
śrutaṃ tannindanaṃ tarhi dhārayāmi na dehakam //

tasmāt tyakṣya imaṃ deham ity uktvā sā mahāsatī
kopena mahatāviṣṭā prajajvāla sureśvarī //

śivaikacetanā dehaṃ balād yogāc ca tatyaje
maheśvaro 'pi sakalaṃ vṛttam ākarṇya nāradāt //

dṛṣṭvā cukopa papraccha jayāṃ ca vijayāṃ tathā
te ūcatur ubhe devaṃ dakṣakratuvināśanam //

dākṣāyaṇyā iti śrutvā makhaṃ prāyān maheśvaraḥ
bhīmair gaṇaiḥ parivṛto bhūtanāthaiḥ samaṃ yayau //

makhas tair veṣṭitaḥ sarvo devabrahmapuraskṛtaḥ
dakṣeṇa yajamānena śuddhabhāvena rakṣitaḥ //

vasiṣṭhādibhir atyugrair munibhiḥ parivāritaḥ
indrādityādyair vasubhiḥ sarvataḥparipālitaḥ //

ṛgyajuḥsāmavedaiś ca svāhāśabdair alaṃkṛtaḥ
śraddhā puṣṭis tathā tuṣṭiḥ śāntir lajjā sarasvatī //

bhūmir dyauḥ śarvarī kṣāntir uṣā āśā jayā matiḥ
etābhiś ca tathānyābhiḥ sarvataḥ samalaṃkṛtaḥ //

tvaṣṭrā mahātmanā cāpi kārito viśvakarmaṇā
surabhir nandinī dhenuḥ kāmadhuk kāmadohinī //

etābhiḥ kāmavarṣābhiḥ sarvakāmasamṛddhimān
kalpavṛkṣaḥ pārijāto latāḥ kalpalatādikāḥ //

yad yad iṣṭatamaṃ kiṃcit tatra tasmin makhe sthitam
svayaṃ maghavatā pūṣṇā hariṇā parirakṣitaḥ //

dīyatāṃ bhujyatāṃ vāpi kriyatāṃ sthīyatāṃ sukham
etaiś ca sarvato vākyair dakṣasya pūjitaṃ makham //

ādau tu vīrabhadro 'sau bhadrakālyā yuto yayau
śokakopaparītātmā paścāc chūlapinākadhṛk //

abhyāyayau mahādevo mahābhūtair alaṃkṛtaḥ
tāni bhūtāni parito makhe veṣṭya maheśvaram //

kratuṃ vidhvaṃsayām āsus tatra kṣobho mahān abhūt
palāyanta tataḥ kecit kecid gatvā tataḥ śivam //

kecit stuvanti deveśaṃ kecit kupyanti śaṃkaram
evaṃ vidhvaṃsitaṃ yajñaṃ dṛṣṭvā pūṣā samabhyagāt //

pūṣṇo dantān athotpāṭya indraṃ vyadrāvayat kṣaṇāt
bhagasya cakṣuṣī vipra vīrabhadro vyapāṭayat //

divākaraṃ punar dorbhyāṃ paribhrāmya samākṣipat
tataḥ suragaṇāḥ sarve viṣṇuṃ te śaraṇaṃ yayuḥ //

trāhi trāhi gadāpāṇe bhūtanāthakṛtād bhayāt
maheśvaragaṇaḥ kaścit pramathānāṃ tu nāyakaḥ
tena dagdho makhaḥ sarvo vaiṣṇavaḥ paśyato hareḥ //

hariṇā cakram utsṛṣṭaṃ bhūtanāthavadhaṃ prati
bhūtanātho 'pi tac cakram āpatac ca tadāgrasat //

graste cakre tato viṣṇor lokapālā bhayād yayuḥ
tathā sthitān avekṣyātha dakṣo yajñaṃ surān api
tuṣṭāva śaṃkaraṃ devaṃ dakṣo bhaktyā prajāpatiḥ //

jaya śaṃkara someśa jaya sarvajña śaṃbhave
jaya kalyāṇabhṛc chaṃbho jaya kālātmane namaḥ //

ādikartar namas te 'stu nīlakaṇṭha namo 'stu te
brahmapriya namas te 'stu brahmarūpa namo 'stu te //

trimūrtaye namo deva tridhāma parameśvara
sarvamūrte namas te 'stu trailokyādhāra kāmada //

namo vedāntavedyāya namas te paramātmane
yajñarūpa namas te 'stu yajñadhāma namo 'stu te //

yajñadāna namas te 'stu havyavāha namo 'stu te
yajñahartre namas te 'stu phaladāya namo 'stu te //

trāhi trāhi jagannātha śaraṇāgatavatsala
bhaktānām apy abhaktānāṃ tvam eva śaraṇaṃ prabho //

evaṃ tu stuvatas tasya prasanno 'bhūn maheśvaraḥ
kiṃ dadāmīti taṃ prāha kratuḥ pūrṇo 'stu me prabho //

tathety uvāca bhagavān devadevo maheśvaraḥ
śaṃkaraḥ sarvabhūtātmā karuṇāvaruṇālayaḥ //

kratuṃ kṛtvā tataḥ pūrṇaṃ tasya dakṣasya vai mune
evam uktvā sa bhagavān bhūtair antaradhīyata //

yathāgataṃ surā jagmuḥ svam eva sadanaṃ prati
tataḥ kadācid devānāṃ daityānāṃ vigraho mahān //

babhūva tatra daityebhyo bhītā devāḥ śriyaḥ patim
tuṣṭuvuḥ sarvabhāvena vacobhis taṃ janārdanam //

śakrādayo 'pi tridaśāḥ kaṭākṣam avekṣya yasyās tapa ācaranti
sā cāpi yatpādaratā ca lakṣmīs taṃ brahmabhūtaṃ śaraṇaṃ prapadye

yasmāt trilokyāṃ na paraḥ samāno na cādhikas tārkṣyarathān nṛsiṃhāt
sa devadevo 'vatu naḥ samastān mahābhayebhyaḥ kṛpayā prapannān

tataḥ prasanno bhagavāñ śaṅkhacakragadādharaḥ
kimartham āgatāḥ sarve tatkartāsmīty uvāca tān //

bhayaṃ ca tīvraṃ daityebhyo devānāṃ madhusūdana
tatas trāṇāya devānāṃ matiṃ kuru janārdana //

tān āgatān hariḥ prāha grastaṃ cakraṃ hareṇa me
kiṃ karomi gataṃ cakraṃ bhavantaś cārtim āgatāḥ
yāntu sarve devagaṇā rakṣā vaḥ kriyate mayā //

tato gateṣu deveṣu viṣṇuś cakrārtham udyataḥ
godāvarīṃ tato gatvā śaṃbhoḥ pūjāṃ pracakrame //

suvarṇakamalair divyaiḥ sugandhair daśabhiḥ śataiḥ
bhaktito nityavat pūjāṃ cakre viṣṇur umāpateḥ //

evaṃ saṃpūjyamāne tu tayos tattvam idaṃ śṛṇu
kamalānāṃ sahasre tu yadaikaṃ naiva pūryate //

tadāsurāriḥ svaṃ netram utpāṭyārghyam akalpayat
arghyapātraṃ kare gṛhya sahasrakamalānvitam
dhyātvā śaṃbhuṃ dadāv arghyam ananyaśaraṇo hariḥ //

tvam eva deva jānīṣe bhāvam antargataṃ nṛṇām
tvam eva śaraṇo 'dhīśo 'tra kā bhaved vicāraṇā //

vadann udaśrunayano nililye 'sāv itīśvare
bhavānīsahitaḥ śaṃbhuḥ purastād abhavat tadā //

gāḍham āliṅgya vividhair varair āpūrayad dharim
tad eva cakram abhavan netraṃ cāpi yathā purā //

tataḥ suragaṇāḥ sarve tuṣṭuvur hariśaṃkarau
gaṅgāṃ cāpi saricchreṣṭhāṃ devaṃ ca vṛṣabhadhvajam //

tataḥ prabhṛti tat tīrthaṃ cakratīrtham iti smṛtam
yasyānuśravaṇenaiva mucyate sarvakilbiṣaiḥ //

tatra snānaṃ ca dānaṃ ca yaḥ kuryāt pitṛtarpaṇam
sarvapāpavinirmuktaḥ pitṛbhiḥ svargabhāg bhavet
tat tu cakrāṅkitaṃ tīrtham adyāpi paridṛśyate //