Brahma Purana · Chapter 103

śamītīrtham iti khyātaṃ sarvapāpopaśāntidam
tasyākhyānaṃ pravakṣyāmi śṛṇu yatnena nārada //

āsīt priyavrato nāma kṣatriyo jayatāṃ varaḥ
gautamyā dakṣiṇe tīre dīkṣāṃ cakre purodhasā //

hayamedha upakrānte ṛtvigbhir ṛṣibhir vṛte
tasya rājño mahābāhor vasiṣṭhas tu purohitaḥ //

tadyajñavāṭam agamad dānavo 'tha hiraṇyakaḥ
taṃ dānavam abhiprekṣya devās tv indrapurogamāḥ //

bhītāḥ kecid divaṃ jagmur havyavāṭ śamim āviśat
aśvatthaṃ viṣṇur agamad bhānur arkaṃ vaṭaṃ śivaḥ //

somaḥ palāśam agamad gaṅgāmbho havyavāhanaḥ
aśvinau tu hayaṃ gṛhya vāyaso 'bhūd yamaḥ svayam //

etasminn antare tatra vasiṣṭho bhagavān ṛṣiḥ
yaṣṭim ādāya daiteyān nyavārayad athājñayā //

tataḥ pravṛttaḥ punar eva yajño daityo gataḥ svena balena yuktaḥ
imāni tīrthāni tataḥ śubhāni daśāśvamedhasya phalāni dadyuḥ

prathamaṃ tu śamītīrthaṃ dvitīyaṃ vaiṣṇavaṃ viduḥ
ārkaṃ śaivaṃ ca saumyaṃ ca vāsiṣṭhaṃ sarvakāmadam //

devāś ca ṛṣayaḥ sarve nivṛtte makhavistare
tuṣṭāḥ procur vasiṣṭhaṃ taṃ yajamānaṃ priyavratam //

tāṃś ca vṛkṣāṃs tāṃ ca gaṅgāṃ mudā yuktāḥ punaḥ punaḥ
hayamedhasya niṣpattyai ete yātā itas tataḥ //

hayamedhaphalaṃ dadyus tīrthānīty avadan surāḥ
tasmāt snānena dānena teṣu tīrtheṣu nārada
hayamedhaphalaṃ puṇyaṃ prāpnoti na mṛṣā vacaḥ //