Brahma Purana · Chapter 102

sāvitrī caiva gāyatrī śraddhā medhā sarasvatī
etāni pañca tīrthāni puṇyāni munayo viduḥ //

tatra snātvā tu pītvā tu mucyate sarvakalmaṣāt
sāvitrī caiva gāyatrī śraddhā medhā sarasvatī //

etā mama sutā jyeṣṭhā dharmasaṃsthānahetavaḥ
sarvāsām uttamāṃ kāṃcin nirmame lokasundarīm //

tāṃ dṛṣṭvā vikṛtā buddhir mamāsīn munisattama
gṛhyamāṇā mayā bālā sā māṃ dṛṣṭvā palāyitā //

mṛgībhūtā tu sā bālā mṛgo 'ham abhavaṃ tadā
mṛgavyādho 'bhavac chaṃbhur dharmasaṃrakṣaṇāya ca //

tā madbhītāḥ pañca sutā gaṅgām īyur mahānadīm
tato maheśvaraḥ prāyād dharmasaṃrakṣaṇāya saḥ //

dhanur gṛhītvā saśaram īśo 'pi mṛgarūpiṇam
mām uvāca vadhiṣye tvāṃ mṛgavyādhas tadā haraḥ //

tatkarmaṇo nivṛtto 'haṃ prādāṃ kanyāṃ vivasvate
sāvitryādyāḥ pañca sutā nadīrūpeṇa saṃgatāḥ //

tā āgatāḥ punaś cāpi svargaṃ lokaṃ mamāntikam
yatra tāḥ saṃgatā devyā pañca tīrthāni nārada //

saṃgatāni ca puṇyāni pañca nadyaḥ sarasvatī
teṣu snānaṃ tathā dānaṃ yat kiṃcit kurute naraḥ //

sarvakāmapradaṃ tat syān naiṣkarmyān muktidaṃ smṛtam
tatrābhavan mṛgavyādhaṃ tīrthaṃ sarvārthadaṃ nṛṇām
svargamokṣaphalaṃ cānyad brahmatīrthaphalaṃ smṛtam //