Brahma Purana · Chapter 101

purūravasam ākhyātaṃ tīrthaṃ vedavido viduḥ
smaraṇād eva pāpānāṃ nāśanaṃ kiṃ tu darśanāt //

purūravā brahmasadaḥ prāpya tatra sarasvatīm
yadṛcchayā devanadīṃ hasantīṃ brahmaṇo 'ntike
tāṃ dṛṣṭvā rūpasaṃpannām urvaśīṃ prāha bhūpatiḥ //

keyaṃ rūpavatī sādhvī sthiteyaṃ brahmaṇo 'ntike
sarvāsām uttamā yoṣid dīpayantī sabhām imām //

urvaśī prāha rājānam iyaṃ devanadī śubhā
sarasvatī brahmasutā nityam eti ca yāti ca
tac chrutvā vismito rājā ānayemāṃ mamāntikam //

urvaśī punar apy āha rājānaṃ bhūridakṣiṇam //

ānīyate mahārāja tasyāḥ sarvaṃ nivedya ca //

tatas tāṃ prāhiṇot tatra rājā prītyā tadorvaśīm
sā gatvā rājavacanaṃ nyavedayad athorvaśī //

sarasvaty api tan mene urvaśyā yan niveditam
sā tatheti pratijñāya prāyād yatra purūravāḥ //

sarasvatyās tatas tīre sa reme bahulāḥ samāḥ
sarasvān abhavat putro yasya putro bṛhadrathaḥ //

tāṃ gacchantīṃ nṛpagṛhaṃ nityam eva sarasvatīm
sarasvantaṃ tato lakṣma jñātvānyeṣu tathā kṛtam //

tasyai dadāv ahaṃ śāpaṃ bhūyā iti mahānadī
macchāpabhītā vāgīśā prāgād devīṃ ca gautamīm //

kamaṇḍalubhavāṃ pūtāṃ mātaraṃ lokapāvanīm
tāpatrayopaśamanīm aihikāmuṣmikapradām //

sā gatvā gautamīṃ devīṃ prāha macchāpam āditaḥ
gaṅgāpi mām uvācedaṃ viśāpāṃ kartum arhasi //

na yuktaṃ yat sarasvatyāḥ śāpaṃ tvaṃ dattavān asi
strīṇām eṣa svabhāvo vai puṃskāmā yoṣito yataḥ //

svabhāvacapalā brahman yoṣitaḥ sakalā api
tvaṃ kathaṃ tu na jānīṣe jagatsraṣṭāmbujāsana //

viḍambayati kaṃ vā na kāmo vāpi svabhāvataḥ
tato viśāpam avadaṃ dṛśyāpi syāt sarasvatī //

tasmāc chāpān nadī martye dṛśyādṛśyā sarasvatī
yatraiṣā saṃgatā devī gaṅgāyāṃ śāpavihvalā //

tatra prāyān nṛpavaro dhārmikaḥ sa purūravāḥ
tapas taptvā samārādhya devaṃ siddheśvaraṃ haram //

sarvān kāmān athāvāpa gaṅgāyāś ca prasādataḥ
tataḥ prabhṛti tat tīrthaṃ purūravasam ucyate //

sarasvatīsaṃgamaṃ ca brahmatīrthaṃ tad ucyate
siddheśvaro yatra devaḥ sarvakāmapradaṃ tu tat //