Bhela Samhita · Chapter 8.7

phalamātraṃ nirūheṣu śreṣṭham āhur manīṣiṇaḥ /
teṣāṃ tu madanaṃ śreṣṭhaṃ pravadanti cikitsakāḥ //

jīmūtakaṃ praśaṃsanti keciddhāmārgavaṃ tathā /
kṛtavedhanam ity eke kuṭajaṃ prāhurapyatha //

garhitā ssarva evaite vādāḥ pratyekaśaḥ smṛtāḥ /
bheṣajānāṃ ca saṅghāto nirūheṣu praśasyate //

vātapittakaphagnāṃstu nirūhāṃś cānupūrvaśaḥ /
vyākhyāsyāmo yathānyāyaṃ sannipātahitāś ca ye //

dvai pañcamūlyau kolāni naladaśśuṣkamūlakam /
dvipalīnāni sarvāṇi jaladroṇe vipācayet //

aṣṭabhāgāvaśeṣaṃ tu kaṣāyamavatārayet /
kalkapeṣyāṇi cemāni bheṣajāni samāvapet //

nikuñcikāṃ kharapuṣpāṃ pippalīṃ saindhavaṃ vacām /
trapusorvārubījāni śatapuṣpāṃ yavānikām //

kuṣṭhaṃ ca tagaraṃ caiva yaṣṭīmadhukam eva ca /
sakṣīrassakaṣāyaś ca sagomūtraśca kīrtitaḥ //

satailaś ca nirūhaḥ syādvātarogavināśanaḥ /
paṭolapatramūlaṃ ca picumandaṃ śatāvarīm //

trāyamāṇāṃ balāṃ rāsnāṃ bṛhatīṃ kaṇṭakārikām /
guḍūcīṃ triphalāṃ śyāmāṃ sāribāṃ vaṃśakatvacam //

dvipalīnān pṛthagbhāgān pūrvakalpena sādhayet /
madhukaṃ vaṃśakaphalaṃ śatapuṣpāṃ durālabhām //

mahāsahāmaṃśumatīṃ kalkaṃ kuryāt pṛthak pṛthak /
kṣīreṇātha kaṣāyeṇa ghṛtena madhunā tathā //

kalpamiśraḥ sumathito nirūhaḥ pittanāśanaḥ /
daśamūlī karañjau dvau dantī citrakam eva ca //

ekāṣṭhīlā turaṅgī ca triphalā devadāru ca /
pūtikaṃ rauhiṣaṃ śyāmā mūrvā rājatṛṇāni ca //

pṛthak pañcapalānetān sādhayetsarvakalpavit /
adhobhāgordhvabhāgdravyaissādhayetsādhu yojitaiḥ //

mūtratailayutaḥ śreṣṭhaḥ nirūhaḥ śleṣmanāśanaḥ /
aśvagandhāṃ balāṃ rāsnāṃ śvadaṃṣṭrāṃ sapunarnavām //

paṭolapañcamūlyau ca bhārṅgīṃ śyāmāṃ śatāvarīm /
guḍūcīṃ triphalāṃ śigruṃ karṇikāyāḥ phalāni ca //

uśīraṃ rajanīpatraṃ pūtikaṃ kattṛṇāni ca /
pṛthak pañcapalānetān khaṇḍaśaśchedayed bhiṣak //

jaladroṇe vipaktavyamaṣṭabhāgāvaśeṣitam /
madhukaṃ śatapuṣpāṃ ca saindhavaṃ sarṣapān guḍam //

hapuṣāmajamodāṃ ca madanasya phalāni ca /
vacāmaśokabījāni pippalīkuṣṭham eva ca //

etāni kalkapeṣyāṇi bheṣajāni pṛthak pṛthak /
kṣīratailasamāyukto ghṛtamūtrasamanvitaḥ //

khajena mathitaḥ pūtaḥ sa nirūhaḥ praśasyate /
ekena yadi vā dvābhyāṃ tribhir vātipramāṇataḥ //

kiṃcinnyūnātiriktaṃ vā jñātvā vyādhibalābalam /
kuryāt , viṃśativarṣāṇāṃ tatra prasthapramāṇataḥ //

atha dvādaśavarṣāṇāmardhaprasthaṃ prayojayet /
kaṣāyakuḍavaṃ cātra ṣaḍvarṣāṇāṃ prayojayet //

yuktaṃ lavaṇatailabhyāṃ kṣīreṇa madhunā tathā /
kaṣāyavastiṃ kurvīta svehād dviprasṛtaṃ bhiṣak //

prasṛtaṃ madhyame kuryāt prasṛtārdhaṃ kanīyasi /
nātiśītaṃ na vātyuṣṇaṃ kaṣāyam upakalpayet //

vāyuḥ kupyati śītatvād atyuṣṇaṃ tu gudaṃ dahet /
atisāndrātigrathito doṣeṇa sa hi mūrchati //

madapravego bhavati vyāpaccāsyopajāyate /
athavāpi tanuryasya kaṣāyo yojito bhavet //

so ' lpaṃ harati doṣaṃ ca na ca saṃśodhayed gudam /
parikartaṃ ca śūlaṃ ca janayec ca pravāhikām //

atyarthamadhuro datto vidagdhaḥ stambhaved anām /
grahaṇīṃ raktamarśāṃsi pāṇḍurogaṃ bhagandaram //

atitīkṣṇas tu duryuktaḥ kṣipraṃ pratinivartate /
na nirharati doṣāṃś ca jvaraṃ mūrchāṃ karoti ca //

jvaritaṃ dahyamānaṃ ca mūrchamānaṃ ca mānavam /
śītairmadhurasaṃyuktairyojayetkṣīravastibhiḥ //

yasyātha lavaṇaḥ koṣṭhe nirūhaḥ paittikīṃ rujām /
janayet tatra peṣyaṃ syānmadhureṇa nirūhaṇam //

nirūho madhuro yasya śleṣmāṇaṃ parikopayet /
kaṭukaiś ca kaṣāyais taṃ nirūhedyasya mārutaḥ //

prakupyedadhikaṃ tatra mārutaghnaṃ nirūhaṇam /
tasmāllavaṇayuktāni dravyāṇi madhurāṇi ca //

bhiṣagdadyānna śītāni tathoṣṇāni vivecayet /
pitte śīto nirūhaḥ syāduṣṇas tu kaphavātayoḥ //

praśleṣmaṇi pravāte vā pyuṣṇamāsthāpanaṃ bhavet /
madanasya phalaṃ piṣṭvā tailenācchena sādhayet //

tannirūhe praṇaṃsanti phalatailaṃ cikitsakāḥ /
gomūtrayuktametat tu phalatailanirūhaṇam //

nirūhaṃ lavaṇaṃ kuryāc chreṣṭhamānāhabhedanam /
bilvairaṇḍaphalaṃ vāpi paced dviprasthasammitam //

amlaṃ salavaṇaṃ sādhyamaṣṭabhāgāvaśeṣitam /
kaṣāye tatra pīlūni kalkapeṣyāṇi yojayet //

phalatailayuto vastirdeya ānāhabhedanaḥ /
eṣa sarvānudāvartān śophagulmān bhinatty api //

athaiva vastirādhmānamudāvartaṃ vināśayet /
oṣṭhajihvaṃ pṛṣṭhaccūrṇaṃ bṛhatīṃ kaṇṭakārikām //

candanaṃ padmakaṃ caiva vṛntaṃ puṣpaṃ ca śālmaleḥ /
khaṇḍitānāṃ yavānāntu kuḍavaṃ tatra yojayet //

tadaikadhyaṃ pacet sarvaṃ jale cāṣṭaguṇe bhiṣak /
ghṛtena madhunā caiva picchāṃ saṃyojya śaktitaḥ //

nirvāhikāyāṃ śaṃsanti picchāvastim imaṃ budhāḥ /
atas tu ṣoḍaśī caiva pale dve ca punarnave //

kaṭāhake pañcamūlīṃ yavaiḥ saha vipācayet /
upodakāyāḥ kṣuṇṇāyāḥ svarasaṃ ca supīḍitam //

yuktaṃ tena kaṣāyeṇa ghṛtena saha yojayet /
mākṣikeṇa ca saṃyukto vastis tu yavamūrcchitaḥ //

picchāvastir iti khyātaḥ śūle nirvāhikāsu ca /
taruṇaṃ śiṃśupāpatraṃ karbudārasya pallavam //

kṣuṇṇaissaha yavaissiddhaiḥ saṃpiṣṭo ghṛtasaṃyutaḥ /
mākṣikakṣīrasaṃyuktaḥ sa vastir yavamūrcchitaḥ //

nirvāhikāṃ vātaśūlaṃ kṣatakṣīṇasya nāśayet /
ete nirūhā vyākhyātāḥ sarvarogavināśanāḥ /
vyākuleṣu vikārais tu tān bhiṣak saṃprayojayet // ity āha bhagavān ātreyaḥ /
iti bhele saptamo ' dhyāyaḥ // /
/aṣṭamo ' dhyāyaḥ // athāto daśavyāpadāmāsthāpanānuvāsanasiddhiṃ vyākhyāsyāma iti ha smāha bhagavān ātreyaḥ /