Bhela Samhita · Chapter 7.8

phalāni paripakvāni śaṅkhinyāstūddharedbhiṣak /
antarā caitravaiśākhamavyagro yavasaṃgrahe //

anūṣare niruddhāre kṣetre sūryapratāpite /
kṛṣṇamṛtsnāprabhe vāpi tathā ca svarṇamṛttike //

na vyagre na ca valmīke na cāpi tṛṇachādite /
susame bhūpradeśe tu yā jātā śaṅkhinī bhavet //

tasyā droṇaṃ samāvāpya tadbhāṇḍaṃ siddhabandhanam /
yavaparṇoṣitaṃ cāpi samuddhṛtya nidhāpayet //

saptarātraṃ vārdhamāsaṃ samācchādya samantataḥ /
ātape pariśuṣkāṇi sūkṣmacūrṇāni kārayet //

phalānāmatha caiteṣāṃ dvau bhāgau kārayed bhiṣak /
tilaṃ tṛtīyakaṃ kṛtvā kṣodayitvā hyulūkhale //

samyag dṛṣadi niṣpiṣya tailamuddhārayet tataḥ /
śaṅkhinyā hy akṣamātraṃ tu trivṛtkalkamathāpi vā //

tasmiṃstaile payaś caiva bhiṣagdadyāccaturguṇam /
etat sarvaṃ samāloḍya pācayenmṛdunāgninā //

pakvamāhṛtya visrāvya svanuguptaṃ nidhāpayet /
tasyāñjaliṃ prakuñcaṃ vā prasṛtaṃ vāpi pāyayet //

viricyate tena sādhu nāyogo nātiyogitā /
susūkṣmasyātha śaṅkhinyāścūrṇasya prasṛtaṃ śṛtam //

kṣīrapātreṇa saṃyojya pariyogamadhiśrayet /
tathā vipācya visrāvya śītīkṛtyābhimanthayet //

tatra yannavanītaṃ syāt tad uddhṛtya vipācayet /
śaṅkhinīphalakalkena kṣīreṇa salilena ca //

sa pibettad yathotsāhaṃ tena sādhu viricyate /
śaṅkhinīphalakalkantu samyak dṛṣadi peṣayet //

gokṣīreṇa samāloḍya pibettena viricyate /
etenaiva ca kalpena hyuṣṭrīkṣīreṇa pāyayet //

ajākṣīre ' vikākṣīre māhiṣe vātha vā punaḥ /
gomūtreṇoṣṭramūtreṇa cāvimūtreṇa vā punaḥ //

athavā hastimūtreṇa pibettena viricyate /
āmṛdgannatha mṛdvīkāṃ dāpayetphāṇitodake //

bhṛṣṭvā tu śaṅkhinītaile pariyogamadhiśrayet /
ardhaṃ cūrṇāni pippalyā harītakyāś ca dāpayet //

ataḥ pāṇitalaṃ prāśya tena sādhu viricyate /
śaṅkhinīphalamadhyāni dātavyaṃ lavaṇaṃ tathā //

śaṅkhinītailabhṛṣṭāni phāṇitenātha saṃsṛjet /
godhūmājyena saṃsṛjya modakān kārayed bhiṣak //

tāṃstrīn dvau vātha saṃbhakṣya tatassādhu viricyate /
surāṃ sauvīrakaṃ takraṃ dadhimas tu tuṣodakam //

kaṭvaraṃ kolasīdhuṃ vā dadhi pakvarasaṃ tathā /
karkandhubadarāṇāṃ vā sīdhuṃ pīlupriyālayoḥ //

bhavyapārāvatānāṃ ca mṛdvīkāmadyam eva vā /
bilvaśigrukapitthānāṃ rasānvā saha pāyayet //

ayaṃ hi śaṅkhinīkalpo mayā tu samudāhṛtaḥ /
ya evaṃ samprajānāti sa rājñāṃ kartumarhati // ity āha bhagavān ātreyaḥ /
iti bhele kalpasthāne ' ṣṭamo ' dhyāyaḥ // // navamo ' dhyāyaḥ // athātaḥ śyāmātrivṛtkalpaṃ vyākhyāsyāma iti ha smāha bhagavān ātreyaḥ /