Bhela Samhita · Chapter 7.7

tridhā vibhajya matimān svanuguptaṃ nidhāpayet /
rasenāmalakasyāpi dvau bhāgau ścyotayed bhiṣak //

cyutaṃ kaṣāyaṃ vimalaṃ pariyogamadhiśrayet /
tasmiṃs tathā pacyamāne taccūrṇamabhisaṃsṛjet //

tanmātraṃ triphalācūrṇamāvapenmadhusaṃyutam /
lehabhūtaṃ viditvainamathainamavatārayet //

tasya pāṇitalaṃ cūrṇaṃ lehyaṃ tena viricyate /
eteṣāṃ caiva mūlānāṃ kṛtvā cūrṇāni sūkṣmaśaḥ //

śyāmākaṣāyeṇāloḍya ghṛtaṃ siddhaṃ vipācayet /
jānīyāt tad yadā siddham athainam avatārayet //

tad dṛḍhe madhulipte tu nave kumbhe samāvapet /
mṛtsnābhiḥ svanulipte tu svanuguptaṃ nidhāpayet //

prasṛtaṃ pāyayet tatra tena sādhu viricyate /
eteṣāṃ caiva mūlānāṃ kṛtvā cūrṇāni sarvaśaḥ //

bṛhatīrasasammiśraiḥ gulikāṃ kārayet tu taiḥ /
gulikāṃ kārayitvā tu karkandhubadaropamām //

śyāmākaṣāyeṇāloḍya dve vā tisro ' pi vā tataḥ /
pāyayet tu yathotsāhaṃ taṃ snigdhasveditaṃ naram //

viricyate tena sādhu nāyogo nātiyogitā /
snehādi snehamūlaṃ tu pracchardanavirecanam /
nāparisnigdhakoṣṭhasya prasidhyati viśodhanam // ity āha bhagavān ātreyaḥ /
iti bhele kalpasthāne saptamo ' dhyāyaḥ // // aṣṭhamo ' dhyāyaḥ // athātaḥ śaṅkhinīkalpaṃ vyākhyāsyāma iti ha smāha bhagavān ātreyaḥ /