ભેલસંહિતા · અધ્યાય 7.7

ત્રિધા વિભજ્ય મતિમાન્ સ્વનુગુપ્તં નિધાપયેત્ ।
રસેનામલકસ્યાપિ દ્વૌ ભાગૌ શ્ચ્યોતયેદ્ ભિષક્ ॥

ચ્યુતં કષાયં વિમલં પરિયોગમધિશ્રયેત્ ।
તસ્મિંસ્ તથા પચ્યમાને તચ્ચૂર્ણમભિસંસૃજેત્ ॥

તન્માત્રં ત્રિફલાચૂર્ણમાવપેન્મધુસંયુતમ્ ।
લેહભૂતં વિદિત્વૈનમથૈનમવતારયેત્ ॥

તસ્ય પાણિતલં ચૂર્ણં લેહ્યં તેન વિરિચ્યતે ।
એતેષાં ચૈવ મૂલાનાં કૃત્વા ચૂર્ણાનિ સૂક્ષ્મશઃ ॥

શ્યામાકષાયેણાલોડ્ય ઘૃતં સિદ્ધં વિપાચયેત્ ।
જાનીયાત્ તદ્ યદા સિદ્ધમ્ અથૈનમ્ અવતારયેત્ ॥

તદ્ દૃઢે મધુલિપ્તે તુ નવે કુમ્ભે સમાવપેત્ ।
મૃત્સ્નાભિઃ સ્વનુલિપ્તે તુ સ્વનુગુપ્તં નિધાપયેત્ ॥

પ્રસૃતં પાયયેત્ તત્ર તેન સાધુ વિરિચ્યતે ।
એતેષાં ચૈવ મૂલાનાં કૃત્વા ચૂર્ણાનિ સર્વશઃ ॥

બૃહતીરસસમ્મિશ્રૈઃ ગુલિકાં કારયેત્ તુ તૈઃ ।
ગુલિકાં કારયિત્વા તુ કર્કન્ધુબદરોપમામ્ ॥

શ્યામાકષાયેણાલોડ્ય દ્વે વા તિસ્રો ઽ પિ વા તતઃ ।
પાયયેત્ તુ યથોત્સાહં તં સ્નિગ્ધસ્વેદિતં નરમ્ ॥

વિરિચ્યતે તેન સાધુ નાયોગો નાતિયોગિતા ।
સ્નેહાદિ સ્નેહમૂલં તુ પ્રચ્છર્દનવિરેચનમ્ ।
નાપરિસ્નિગ્ધકોષ્ઠસ્ય પ્રસિધ્યતિ વિશોધનમ્ ॥ ઇત્ય્ આહ ભગવાન્ આત્રેયઃ ।
ઇતિ ભેલે કલ્પસ્થાને સપ્તમો ઽ ધ્યાયઃ ॥ ॥ અષ્ઠમો ઽ ધ્યાયઃ ॥ અથાતઃ શઙ્ખિનીકલ્પં વ્યાખ્યાસ્યામ ઇતિ હ સ્માહ ભગવાન્ આત્રેયઃ ।