Bhela Samhita · Chapter 7.6

manojñadeśajātas tu yo bhavec caturaṅgulaḥ /
phalamuṣṭiṃ samāhṛtya tataścūrṇāni kārayet //

taccūrṇitaṃ tridhākṛtya bhāgamekaṃ nidhāpayet /
dvau bhāgau ca śucissamyak kṛtvā manthanam eva tu //

ścyotayitvā parisrutya suprasannamanāvilam /
paribhāgaṃ samāvāpya sādhayed gomayāgninā //

tasmiṃs tathā sicyamāne sūkṣmāṇīmāni dāpayet /
harītakīmāmalakaṃ vibhītakaphalāni ca //

madhūkabhāgamāvāpya tadvilepanamāharet /
tataḥ pāṇitalaṃ cūrṇaṃ lehyaṃ tena viricyate //

etenaiva ca kalpena kaṇṭakāryāḥ phalair api /
ścyotayitvā lehajātaṃ paritaḥ sāsavaṃ pibet //

caturaṅgulasiddhā vā peyā yojyā susaṃskṛtā /
viricyate tena sādhu nāyogo nātiyogitā //

dhātrīphalarasadroṇe śarkarārdhatulāṃ pacet /
ghṛtaṃ catuṣpalaṃ pakvaṃ pṛthagardhapalaṃ kṣipet //

nataṃ vellaṃ caturjātaṃ yaṣṭisaindhavajīrakam /
palāśaṃ viśvamaricaṃ mṛdvīkāyāścatuṣpalam //

prasthaṃ kaṇātrivṛtayor madhunaś ca nihanti tat /
tatkhaṇḍāmalakaṃ nāma pāṇḍuśvayathukāmilām //

śirobhramaṇamunmādamamlapittavikārajit //

bhallātakānāṃ pavanāhatānāṃ vṛntacyutānāmiha cāṭhakaṃ syāt /
tadiṣṭakācūrṇakaṇairvighṛṣya prakṣālayitvā visṛjetpravāte //

śuṣkaṃ punastadvidalīkṛtaṃ ca vinikṣipedapsu caturguṇāsu /
pādāvaśiṣṭaṃ paripūtaśītaṃ kṣīreṇa tulyena punaḥ paceta //

tatpādaśiṣṭaṃ punareva śītaṃ ghṛtena tulyena punaḥ paceta /
tadardhayā śarkarayāvagāṭhaṃ lohābhayāvyoṣakacūrṇayuktam //

etatsamaṃ śārkarapādayuktaṃ tataḥ khajenonmathitaṃ nidhāya /
prasthadvayenāmalakīmadhūnāṃ śīte ' tha dhānyena punaḥ paceta //

tatsaptarātrādupajātavīryaṃ sudhārasādapyadhikatvameti /
prātarviśuddhīkṛtadehabhājāṃ mātrāṃ dadītātmaśarīrayogyām //

na cānnapāne parihāryamāste na coṣṇavātādhvani maithune ca /
janturnitāntaṃ narasihmavatsyādbhaven naraḥ kāñcanarāśigauraḥ //

dantāś ca śīrṇāḥ punarudbhavanti keśāś ca śuklāḥ punareva kṛṣṇāḥ /
viśīrṇakarṇāṅgulināsiko ' pi kṛmyardito bhinnagalo ' pi kuṣṭhī //

so ' pi krameṇāṅguligātraśākhastaruryathā rohati vārisiktaḥ /
mahāmayūrāñjayati svareṇa balena nāgāṃsturagān javena //

/.. /.. /.. /.. /.. sudhākṣīreṇa bhāvayet /
tatpibet tu yathotsāhaṃ tena sādhu viricyate //

dantyakṣatā tu tejohvā tarkārī sudurālabhā /
kaṣāyakvātha ity etatsudhākṣīreṇa miśrayet //

tatpibet tu yathotsāhaṃ tena sādhu viricyate /
sudhākṣīreṇa gokṣīramekasthamabhisaṃsṛjet //

tatpibet tu yathotsāhaṃ tena sādhu viricyate /
kṛtamūtrapurīṣasya vāte cāpy anulomite //

prathamaṃ snigdhakoṣṭhasya svinnasya ca yathāvidhi /
sandhyāvelāmatikramya vimale ca divākare /
maitre muhūrte vyakte tu yogānetān prayojayet // ity āha bhagavān ātreyaḥ // iti bhele kalpasthāne ṣaṣṭho ' dhyāyaḥ // // saptamo ' dhyāyaḥ // athāto dantīphalakalpaṃ vyākhyāsyāma iti ha smāha bhagavān ātreyaḥ /
/.. /.. /.. /.. /.. /.. /.. /..