Bhela Samhita · Chapter 7.5

vasante vā śaradi vā kuṭajāny uddhared bhiṣak /
śuciśśuddhaśśiraḥsnātaḥ puṣyeṇāśvayujena vā //

pratūṭhāni śucau deśe kuśarohiṣasaṃskṛte /
kṛṣṇamṛtsnāprabhe vāpi tathā vā svarṇamṛttike //

vyātape na nadītīre śvabhravalmīkayos tathā /
paripūrṇāni pakvāni tathā jātarasāni ca //

kuṭajānāmathaiteṣāṃ muṣṭiṃ saṅgṛhya sannakham /
kovidārakaṣāyeṇa rātrimekāṃ nidhāpayet //

atha cotthāya pūrvāhṇe hastau prakṣālya mardayet /
parisrutaṃ salavaṇaṃ madhuyuktaṃ pratāpya ca //

pāyayed āturaṃ snigdhaṃ chardayet tena sādhu saḥ /
anenaiva ca kalpena kaṣāyaṃ kārayed bhiṣak //

kovidārasya bījaiś ca nīpasya vidulasya ca /
gulūcyāśca suṣvyāś ca paṭolapicumandayoḥ //

kṛtvā madhūlikāyāś ca kaṣāyaṃ tena chardayet /
eṣām eva phalānāntu muṣṭiṃ saṃgṛhya sannakham //

madhukasya kaṣāyeṇa taccūrṇaṃ parimardayet //

gulikāḥ kārayet tena karkandhubadaropamāḥ /
kovidārakaṣāyeṇa pūrvakaloena chardayet //

yathābalaṃ yathoddiṣṭaṃ chardayet tena sādhu saḥ /
kṛtavedhanakalpo ' yamukto vamanavistare //

ya evaṃ samprajānāti sa rājñāṃ kartumarhati // ity āha bhagavān ātreyaḥ /
iti bhele kalpasthāne pañcamo ' dhyāyaḥ // // ṣaṣṭho ' dhyāyaḥ // athātaścaturaṅgulīyaṃ kalpaṃ vyākhyāsyāma iti ha smāha bhagavān ātreyaḥ /