भेलसंहिता · अध्याय 7.5

वसन्ते वा शरदि वा कुटजान्य् उद्धरेद् भिषक् ।
शुचिश्शुद्धश्शिरःस्नातः पुष्येणाश्वयुजेन वा ॥

प्रतूठानि शुचौ देशे कुशरोहिषसंस्कृते ।
कृष्णमृत्स्नाप्रभे वापि तथा वा स्वर्णमृत्तिके ॥

व्यातपे न नदीतीरे श्वभ्रवल्मीकयोस् तथा ।
परिपूर्णानि पक्वानि तथा जातरसानि च ॥

कुटजानामथैतेषां मुष्टिं सङ्गृह्य सन्नखम् ।
कोविदारकषायेण रात्रिमेकां निधापयेत् ॥

अथ चोत्थाय पूर्वाह्णे हस्तौ प्रक्षाल्य मर्दयेत् ।
परिस्रुतं सलवणं मधुयुक्तं प्रताप्य च ॥

पाययेद् आतुरं स्निग्धं छर्दयेत् तेन साधु सः ।
अनेनैव च कल्पेन कषायं कारयेद् भिषक् ॥

कोविदारस्य बीजैश् च नीपस्य विदुलस्य च ।
गुलूच्याश्च सुष्व्याश् च पटोलपिचुमन्दयोः ॥

कृत्वा मधूलिकायाश् च कषायं तेन छर्दयेत् ।
एषाम् एव फलानान्तु मुष्टिं संगृह्य सन्नखम् ॥

मधुकस्य कषायेण तच्चूर्णं परिमर्दयेत् ॥

गुलिकाः कारयेत् तेन कर्कन्धुबदरोपमाः ।
कोविदारकषायेण पूर्वकलोएन छर्दयेत् ॥

यथाबलं यथोद्दिष्टं छर्दयेत् तेन साधु सः ।
कृतवेधनकल्पो ऽ यमुक्तो वमनविस्तरे ॥

य एवं सम्प्रजानाति स राज्ञां कर्तुमर्हति ॥ इत्य् आह भगवान् आत्रेयः ।
इति भेले कल्पस्थाने पञ्चमो ऽ ध्यायः ॥ ॥ षष्ठो ऽ ध्यायः ॥ अथातश्चतुरङ्गुलीयं कल्पं व्याख्यास्याम इति ह स्माह भगवान् आत्रेयः ।