Bhela Samhita · Chapter 7.4

dhāmārgavānyuddhareta vasante vā śarady api /
yadā prapuṣpitāni syuḥ madhugandhīni bhānti ca //

same bhūmipradeśe ' smin kuśarohiṣasaṃskṛte /
kṛṣṇamṛtsnāprabhe vāpi hyathavā svarṇamṛttike //

vyātape na nadītīre śvabhravalmīkayos tathā /
paripūrṇāni pakvāni tathā jātarasāni ca //

bhiṣaguddhṛtya matimān yavapalle nidhāpayet /
vusapalle ' tha vā dhīraḥ saptarātraṃ nidhāpayet //

subhāvitāni vijñāya mṛdubhūtāni śāstravit /
jarjarīkṛtya dṛṣadi pātreṣvāsicya nirharet //

kovidārakaṣāyeṇa rātrimekāṃ nidhāpayet /
atha cotthāya pūrvāhṇe hastau prakṣālya mardayet //

parisrutaṃ salavaṇaṃ madhuyuktaṃ pratāpya ca /
pāyayed āturaṃ snigdhaṃ chardayet tena sādhu saḥ //

dhāmārgavāṇāmeteṣāṃ muṣṭiṃ saṃgṛhya sannakham /
jarjarīkṛtya dṛṣadi pātreṣv abhyavahārayet //

kovidārakaṣāyeṇa rātrimekāṃ nidhāpayet /
pūrvoktenaiva kalpena vāmayet tu yathābalam //

naladasya kaṣāyeṇa tālīsaśatapuṣpayoḥ /
kuṣṭhasya mūrvāpāṭhāyāḥ pūrvakalpena chardayet //

dhāmārgavāñjaliṃ pūrṇaṃ sūkṣmacūrṇāni kārayet /
śyāmākaṣāye prakṣipya caikarātraṃ yathāvidhi //

tathā phalakaṣāye ' sminnikṣvākukṛtavedhane /
jīmūtake hastiparṇe kaṣāye paribhāvayet //

tata uddhṛtya saṃśoṣya sūkṣmacūrṇāni kārayet /
kṛsarāṃ tena saṃyuktāṃ nātyuṣṇāṃ pāyayennaram //

utpalaṃ puṇḍarīkaṃ ca naladaṃ kumudaṃ tathā /
tena cūrṇena saṃspṛśya ghrātumasmai pradāpayet //

sirāhṛdayamāpnoti yāvattatkila miśrakam /
tvaritaṃ tāni puṣpāṇi ghrātumasmai pradāpayet //

ghrātuṃ punaḥ punarmadhyaṃ cūrṇayitvā muhurmuhuḥ /
anenaiva ca kalpena sukhaṃ vamati mānavaḥ //

dhāmārgavāñjaliṃ pūrṇaṃ sūkṣmacūrṇāni kārayet /
tridhā vibhajya matimān svanuguptaṃ nidhāpayet //

atha bilvakaṣāyeṇa dvau bhāgau ścyotayed bhiṣak /
cyute kaṣāye vimale svanuguptaṃ nidhāpayet //

bhāgaṃ tu gulikāḥ kāryāḥ kolakarkandhusammitāḥ /
kovidārakaṣāyeṇa pūrvakalpena chardayet //

karkandhūbadarāṇāṃ ca kolānāṃ vāpi sīdhunā /
gulikāṃ vinīya vidhivacchardayet tena sādhu saḥ //

rohitasya ca matsyasya tathā karkaṭakasya ca /
pakṣiṇāmaudakānāṃ ca rasena tu vametsukham //

etena khalu kalpena cāmlaiś ca madhusīdhubhiḥ /
gulikāṃ vinīya vidhivat pāyayet tāṃ yathābalam // ity āha bhagavān ātreyaḥ /
iti bhele caturtho ' dhyāyaḥ // // pañcamo ' dhyāyaḥ // athātaḥ kuṭajakalpaṃ vyākhyāsyāma iti ha smāha bhagavān ātreyaḥ /