Bhela Samhita · Chapter 7.3

ikṣvākūṇyuddhareddhīmān vasante ' tha śarady api /
yadā prayuṣpitāni syurmadhugandhīni vānti ca //

teṣāṃ kriyāṃ pravakṣyāma ikṣvākūṇāṃ yathā vidhiḥ /
ikṣvākubhiḥ payassiddhaṃ tenaivaṃ vāmayed bhiṣak //

payasā dadhi kṛtvā vā pāyayet tu yathābalam /
nirmathya vāmayeccainaṃ navanītena vā naram //

vihitā cekṣvākuṣveṣā samākhyātā kriyā mayā /
vṛntānyārdrāṇi cādāya sthāpayetphāṇitodare //

ekarātrasthitānyatra hastau prakṣālya mardayet /
parisrutaṃ salavaṇaṃ madhuyuktaṃ pratāpya ca //

pāyayed āturaṃ snigdhaṃ charayet tena sādhu saḥ /
etenaiva ca kalpena ikṣudarbhekṣuvārikaiḥ //

tathā poṭagalekṣośca kārayet tu rasāplutam /
athavā kovidārasya patraissammiśritāni tu //

ikṣvākūṇāṃ pallavāni svedayed gomayāgninā /
tāni svinnāni coddhṛtya kṣodayitvā hyulūkhale //

tataḥ phalakaṣāyeṇa svabhyāsicya samasya ca /
ekarātraṃ kaṣāye ' smin svanuguptaṃ nidhāpayet //

pūrvakalpavidhānena vāmayet taṃ yathābalam /
ikṣvākūṇāṃ prasṛtaṃ ca sūkṣmaṃ cūrṇāni kārayet //

kovidārakaṣāyeṇa gulikāḥ kārayed bhiṣak /
etenaiva kaṣāyeṇa vinīya gulikāntu tām //

yathābalaṃ pāyayet tu chardayet tena sādhu saḥ /
etena khalu kalpena kuśānāṃ tagarasya ca //

etaikasya kaṣāyeṇa susnigdhaṃ vāmayed bhiṣak /
yathābalaṃ yathoddiṣṭaṃ chardayet tena sādhu saḥ //

ikṣvākubhiḥ payassiddhaṃ pāyayet tu yathābalam /
ikṣvākūṇāmayaṃ kalpo vamanārthāya kīrtitaḥ //

mṛdurabhyāsatassiddhaḥ prayojyo deśakālataḥ // ity āha bhagavān ātreyaḥ /
iti bhele kalpasthāne tṛtīyo ' dhyāyaḥ // // caturtho ' dhyāyaḥ // athāto dhāmārgavakalpaṃ vyākhyāsyāma iti ha smāha bhagavān ātreyaḥ /