ભેલસંહિતા · અધ્યાય 7.3

ઇક્ષ્વાકૂણ્યુદ્ધરેદ્ધીમાન્ વસન્તે ઽ થ શરદ્ય્ અપિ ।
યદા પ્રયુષ્પિતાનિ સ્યુર્મધુગન્ધીનિ વાન્તિ ચ ॥

તેષાં ક્રિયાં પ્રવક્ષ્યામ ઇક્ષ્વાકૂણાં યથા વિધિઃ ।
ઇક્ષ્વાકુભિઃ પયસ્સિદ્ધં તેનૈવં વામયેદ્ ભિષક્ ॥

પયસા દધિ કૃત્વા વા પાયયેત્ તુ યથાબલમ્ ।
નિર્મથ્ય વામયેચ્ચૈનં નવનીતેન વા નરમ્ ॥

વિહિતા ચેક્ષ્વાકુષ્વેષા સમાખ્યાતા ક્રિયા મયા ।
વૃન્તાન્યાર્દ્રાણિ ચાદાય સ્થાપયેત્ફાણિતોદરે ॥

એકરાત્રસ્થિતાન્યત્ર હસ્તૌ પ્રક્ષાલ્ય મર્દયેત્ ।
પરિસ્રુતં સલવણં મધુયુક્તં પ્રતાપ્ય ચ ॥

પાયયેદ્ આતુરં સ્નિગ્ધં છરયેત્ તેન સાધુ સઃ ।
એતેનૈવ ચ કલ્પેન ઇક્ષુદર્ભેક્ષુવારિકૈઃ ॥

તથા પોટગલેક્ષોશ્ચ કારયેત્ તુ રસાપ્લુતમ્ ।
અથવા કોવિદારસ્ય પત્રૈસ્સમ્મિશ્રિતાનિ તુ ॥

ઇક્ષ્વાકૂણાં પલ્લવાનિ સ્વેદયેદ્ ગોમયાગ્નિના ।
તાનિ સ્વિન્નાનિ ચોદ્ધૃત્ય ક્ષોદયિત્વા હ્યુલૂખલે ॥

તતઃ ફલકષાયેણ સ્વભ્યાસિચ્ય સમસ્ય ચ ।
એકરાત્રં કષાયે ઽ સ્મિન્ સ્વનુગુપ્તં નિધાપયેત્ ॥

પૂર્વકલ્પવિધાનેન વામયેત્ તં યથાબલમ્ ।
ઇક્ષ્વાકૂણાં પ્રસૃતં ચ સૂક્ષ્મં ચૂર્ણાનિ કારયેત્ ॥

કોવિદારકષાયેણ ગુલિકાઃ કારયેદ્ ભિષક્ ।
એતેનૈવ કષાયેણ વિનીય ગુલિકાન્તુ તામ્ ॥

યથાબલં પાયયેત્ તુ છર્દયેત્ તેન સાધુ સઃ ।
એતેન ખલુ કલ્પેન કુશાનાં તગરસ્ય ચ ॥

એતૈકસ્ય કષાયેણ સુસ્નિગ્ધં વામયેદ્ ભિષક્ ।
યથાબલં યથોદ્દિષ્ટં છર્દયેત્ તેન સાધુ સઃ ॥

ઇક્ષ્વાકુભિઃ પયસ્સિદ્ધં પાયયેત્ તુ યથાબલમ્ ।
ઇક્ષ્વાકૂણામયં કલ્પો વમનાર્થાય કીર્તિતઃ ॥

મૃદુરભ્યાસતસ્સિદ્ધઃ પ્રયોજ્યો દેશકાલતઃ ॥ ઇત્ય્ આહ ભગવાન્ આત્રેયઃ ।
ઇતિ ભેલે કલ્પસ્થાને તૃતીયો ઽ ધ્યાયઃ ॥ ॥ ચતુર્થો ઽ ધ્યાયઃ ॥ અથાતો ધામાર્ગવકલ્પં વ્યાખ્યાસ્યામ ઇતિ હ સ્માહ ભગવાન્ આત્રેયઃ ।