Scripture Library

Bhela Samhita · Chapter 6.9

6.9.1

uktaṃ rūpaṃ samutthānamapasmārasya kṛtsnaśaḥ /
nidāneṣu, cikitsāṃ tu vistareṇa nibodha me //

6.9.2

gajāśvayānātpatanādabhighātāt bhramād api /
iṣṭadravyavināśāc ca cittaṃ vibhramamṛcchati //

6.9.3

tasya citte paribhrānte hṛdayaṃ pariśuṣyati /
ruṇaddhi vāyurūṣmāṇaṃ nāḍīṃ prāpya jalāvahām //

6.9.4

bhṛśaṃ tṛṣṇāparītaḥ sa mohaṃ gacchatyapasmaran /
apasmaratyapasmārī phenaṃ muñcati vepate //

6.9.5

seveta tailaṃ śairīṣaṃ ghṛtaṃ kalyāṇakaṃ tathā /
mahāpaiśācikaṃ vāpi mahākṣāraṃ ca dādhikam //

6.9.6

śaṇabījāni kaiḍaryaṃ /.. /.. cāpalūnakam /
rūpasthā ca vayasthā ca pūtanā keśamāriṇī //

6.9.7

triphalā tryūṣaṇaṃ mustā laśunaṃ pāpacelikā /
etāni samabhāgāni vasātailaghṛtāni ca //

6.9.8

ūrṇakaṃ ca tathaikadhyaṃ paced gomūtrasaṃyutam /
yadā prajvalitaṃ śāntamathainamavatārayet //

6.9.9

biḍālapadamātraṃ tu kṣārasyāsya sukhāmbunā /
pibed apasmāraharam unmādasya ca nāśanam /
arśāṃsi gulmānmehāṃś ca plīhānamudarāmayam // // daśamo ' dhyāyaḥ //

Original text: Bhelasaṃhitā · Edition: ed. V. S. Venkatasubramania Sastri and C. Raja Rajeswara Sarma (CCRAS, New Delhi); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0