Bhela Samhita · Chapter 6.7

striyaṃ ca yuktyā seveta divāsvapnaṃ ca varjayet /
kaṣāyasnānanity asya kaṣāyodakasevinaḥ //

viśeṣataḥ śleṣmamehān tīkṣṇair eva samācaret /
sakaṣāyaṃ ca tiktaṃ ca paittikeṣu prayojayet //

asādhyavātajānmehāṃścaturaḥ parivarjayet /
aruciś cāṅgamardaś ca tṛṣṇākāsau bhramastamaḥ //

śūlāni piṭakā kaṇḍūḥ pramehāṇām upadravāḥ /
akriyābhiḥ prameheṣu piṭakāsv apikārayet //

upadravaiś ca yuktānāṃ piṭakābhis tathaiva ca /
pramehiṇāmidaṃ proktaṃ mayā bhaiṣajyam uttamam //

vyastairetaissamastaiś ca yo gais tu pravibhāgaśaḥ /
cikitsāṃ kalpayed vaidyo yathādoṣaṃ yathābalam //

viṃśatermūtrarogāṇāṃ lakṣaṇāni nirīkṣya tu /
doṣasaṃsargahetūṃś ca tato yogān prakalpayet //

uddeśamātraṃ teṣāṃ tu tasmād vakṣyāmi bheṣajam /
bhūyo mūtrapraśāntyarthaṃ pravibhāgaṃ ca tacchṛṇu //

śatāvarīmūlarasaḥ samāṃśo madhusarpiṣā /
ikṣumehe tu pātavyaḥ kaphapittapraśāntaye //

kirātatiktasvarasaḥ paṭolārukayos tathā /
sakṣaudraḥ śamayenmehaṃ kvāthastūdakasaṃjñitam //

pippalī śṛṅgiberaṃ ca maricāni tathaiva ca /
pibetsukhāmbunā hyetatsāndramehātpramucyate //

cavyacitrakamūlāni pūtikasya tvacas tathā /
khale yūṣeṣu saṃskṛtya bhuñjāno vai sukhī bhavet //

kṣīrasiddhairyavairbhakṣyairyacchastaṃ hiṅgusaṃyutam /
ghṛtaṃ prasaṅgena piban bhasmamehātpramucyate //

kapitthaś cājamodā ca maricāni tathaiva ca /
tato yutaṃ tairlavaṇaṃ kācaproktaṃ pradāpayet //

pippalīkaṇasaṃyuktaṃ madhuyuktaṃ saśarkaram /
jayellavaṇamehantu pītaṃ śītena vāriṇā //

mehayuktena bhoktavyaṃ sāndraprasravaṇena vā /
etat tu vijayennityaṃ mehaṃ lavaṇasaṃbhavam //

elāpravālakaṃ hiṅgu lavaṇaṃ ca samaṃ bhavet /
madyenoṣṇena vā pītaṃ mehaṃ sasikataṃ jayet //

tumburūṇi kapitthānāṃ niryāsaṃ kṣaudrasaṃyutam /
śuklamehe praśaṃsanti yavānnasya ca sevanam //

sakulutthāni yūṣāṇi sadravāṇi viśeṣataḥ /
bhojyāni śuklameheṣu yavānnavikṛtis tathā //

śvadaṃṣṭrādarbhamūlais tu kevalaṃ kvathitaṃ payaḥ /
saśarkaraṃ pibejjantuḥ kṣāramehātpramucyate //

drākṣāśṛtaṃ vāpi pibet tathā kṣīriśṛtaṃ naraḥ /
pittamehātpramucyeta kṣāramehāc ca sarvaśaḥ //

pītāmañjiṣṭhacūrṇau dvau mehanāc ca prayojayet /
sakṣaudraṃ śītamehe tu yavānnopahitaṃ sadā //

madayanty āś ca patrāṇāṃ kalkaṃ kṣaudrayutaṃ pibet /
darbhamūlasya ca tathā raktamehī sukhī bhavet //

pibet tu te sapayasī nīlamehātpramucyate /
prarohaiḥ kṣīrivṛkṣāṇāṃ kṣīraṃ saṃkvathitaṃ pibet //

saśarkareṇa mucyeta nīlamehāattu paittikāt /
kumudotpaladaṇḍaiś ca sanālaiḥ kvathitais tathā //

pibetprāyo yathāśakti vārimehātpramucyate /
samāṃ kṣīrāśanaś cāpi yavānnamitabhojanaḥ //

śarkarāsamabhāgaṃ tu kṣaudreṇa saha saṃsṛjet /
śītena toyena pibannambumehātpramucyate //

ity etat ṣoḍaśānāṃ tu kaphapittaharaṃ pṛthak /
cikitsitaṃ mayā proktaṃ pramehāṇāṃ vināśanam //

asādhyā vātajāś caiva vijñeyā bhṛśadāruṇāḥ /
avagādyātisūkṣmatvād dāyā prasravaṇaṃ śṛtam //

āsthāpanair vātaharaiḥ sukṛtaiś cānuvāsanaiḥ /
majjapramehiṇaṃ dṛṣṭvā bahuśastamupācaret //

prātaḥ prātaś ca seveta kevale madhusarpiṣī /
koradūṣayavānnāni sthitāni ca viśeṣataḥ //

hastimehaṃ jayed evaṃ vastisvedaiḥ prayatnataḥ /
yatnavānvātamehaṃ hi bastamūtrāṇi vā caret //

pāyayeccārayec cāpi gajamehaṃ bhayāvaham /
kaṣāyaistiktakaṭukaiḥ rasairetaiḥ, pibetpayaḥ //

śāstroktāmatha saṃprekṣya kriyāmetāṃ vicakṣaṇaḥ /
yathāsvaṃ hi sampradhārya pramehān sādhayed bhiṣak //

etatpramehikaṃ proktaṃ śiṣyāṇāmārthasiddhaye /
cikitsitaṃ vistareṇa yathāvadanupūrvaśaḥ // ity āha bhagavān ātreyaḥ /
iti bhele cikitsite saptamo ' dhyāyaḥ // // aṣṭamo ' dhyāyaḥ // athāta unmādacikitsitaṃ vyākhyāsyāma iti ha smāha bhagavān ātreyaḥ /