Bhela Samhita · Chapter 6.27

vraṇasya kāle sampaśyan tataḥ kuryād upakramam /
bhedanaṃ pācanaṃ caiva stambhanaṃ śoṣaṇaṃ tathā //

srāvaṇaṃ ropaṇaṃ caiva vraṇe kuryād upakramam /
uditā karṇamoṭaśca rāsnā mūlakaparṇikā //

śukanāsā sugandhā ca samaṅgā caiva kuṣṭhakam /
kāleyakaṃ balā dantī pāṭhā śatapadī sthirā //

pīḍanīyaḥ praleyo ' yaṃ vraṇaśvayathunāśanaḥ /
udumbaraḥ śirīṣaś ca madhukaṃ candanaṃ tilāḥ //

indukāntaṃ samudrāntā tathaiva ca śatāvarī /
nīlotpalaṃ padmakaṃ ca tvacā dve cāpi sāribe //

eṣa pralepo gāraṃ ca vraṇānāṃ tu vināśayet /
tilakalkassamadhukaḥ picumandasya kalkavān //

pūrvābhyāṃ sarpiṣā yukto vraṇeṣu vraṇaropaṇaḥ /
triphalā dhātakī lodhraṃ samaṅgā madhukaṃ balā //

dve bṛhatyau samudrāntā tathaiva ca śatāvarī /
nīlotpalaṃ kaṭphalaṃ ca mālatī svarṇayūthikā //

eṣāṃ kalkaissamaissiddhaṃ tailaṃ syād vraṇaropaṇam /
nimbvāmrāmalakīnāṃ ca pallavaṃ madhukaṃ balā //

etaiśśakṛdrasesiddhaṃ tailaṃ vraṇanibarhaṇam /
nyagrodhodumbarāśvatthaplakṣapāṭhāvarārjunāḥ //

śamībadaryā eteṣāṃ kaṣāyā vraṇadhāvanāḥ /
yavānnaṃ śālikā raktā mudgā nīvāraṣaṣṭikāḥ //

jāṅgalāni ca māṃsāni vraṇitaśśīlayetsadā /
amlaṃ dadhi ca śākaṃ ca māṃsaṃ cānūpavārijam //

kṣīraṃ gurūṇi cānnāni vraṇitaḥ parivarjayet /
etanupakramān kuryād vraṇe kāyacikitsakaḥ //

śalyakṛc cāpi kurvīta vraṇe śeṣānupakramān /
chedyaṃ bhedyaṃ ca lekhyaṃ ca sīvyaṃ pracchanam eva ca //

pācanaṃ yac ca tastulyaṃ bhaved anyac ca kiṃcana /
dvādaśa vraṇadoṣāśca parīkṣā caiva ṣaḍvidhā //

upakramāś ca ṣaṭtriṃśanniyatāḥ śalyahetuke /
uddeśataḥ kriyāś caitāḥ kuryāt kāyacikitsakaḥ //

triphalā madhukaṃ lodhraṃ mañjiṣṭhā bilvaśuṇṭhikā /
samaṅgā dhātakī lākṣā viryāsaḥ śālmalerapi //

pālāśasya ca niryāso niryāsaḥ kakubhasya ca /
sūkṣmāny etāni cūrṇāni vraṇānāṃ ropaṇaṃ param //

gugguloḥ sallakīnāṃ ca sarjasya tiniśasya ca /
niryāsā ropaṇāḥ poktāḥ samastāḥ pṛthageva vā //

vraṇe dhūmakramā ye ca pratyutpattau ca yā kriyā /
etaccheṣaṃ śalyakṛtā kartavyaṃ dṛṣṭakarmaṇā // ity āha bhagavān ātreyaḥ /
iti bhele saptaviṃśo ' dhyāyaḥ // // aṣṭāviṃśo ' dhyāyaḥ // athātaḥ pānātyayacikitsitaṃ vyākhyāsyāma iti ha smāha bhagavān ātreyaḥ /