Bhela Samhita · Chapter 6.25

abhiṣyandīni bhojyāni bhuñjītātīva yo naraḥ /
laṅghito vā virikto vā vyāyāmam upasevate //

bhuktvā pītodako yas tu sahasā saṃpradhāvati /
pṛṣṭhayānād drutāc cāpi plavanātsnehavibhramāt //

rogairanyaiś ca klinnānāṃ kurbalānāṃ ca dehinām /
plīhā sthānātpravardheta tasya rūpāṇi me śṛṇu //

karotyagnermārdavaṃ ca śūlaṃ kaṭhina eva ca /
mahāparigrahaścaiṣa plīhā vātasamudbhavaḥ //

sajvaraḥ sapipāsaś ca svedanastīvravedanaḥ /
pītakaḥ stabdhagātraś ca plīhā pittātmako bhavet //

nity ānāhitakoṣṭhaś ca nity odāvartapīḍitaḥ /
vedanābhiparītaś ca plīhā śleṣmātmako mataḥ //

trayāṇāṃ yatra rūpāṇi doṣāṇāṃ lakṣayed bhiṣak /
asādhyam iti taṃ vidyāt plīhānaṃ sānnipātikam //

muṣṭimātrassusādhyas tu paramastamupācaret /
atipramāṇavṛddhas tu na sidhyati kathañcana //

sarveṣu teṣu daurbalyamānāho gātrasādanam /
aruciś cāvipākaś ca varcomūtragraho jvaraḥ //

mārdvīkaṃ ca pibedyuktyā gaṇḍīrāriṣṭam eva vā /
candraprabhaṃ śārkaraṃ vā pāyayet tu halīmake //

ayor ajīyaṃ kṣīreṇa pāyayet tu rasāyanam /
agastyābhayalehaṃ vā seveta prayataḥ śuciḥ // ity āha bhagavān ātreyaḥ // iti bhele pañcaviṃśo ' dhyāyaḥ // // ṣaḍviṃśo ' dhyāyaḥ // athāto ' patantrakacikitsitaṃ vyākhyāsyāma iti ha smāha bhagavān ātreyaḥ /