Bhela Samhita · Chapter 6.2

kecidvātātmakaṃ prāhurbhiṣajo viṣamajvaram /
sannipātodbhavaṃ kecidapare pittasambhavam //

śleṣmajaṃ tvapare prāhurapare bhūtasambhavam /
janmanakṣatrapīḍābhir apare devacintakāḥ //

īdṛśaḥ śāstrakārāṇāṃ matayo ' tha pṛthagvidhāḥ /
sannipātodbhavaṃ hyetadahaṃ vakṣyāmi hetubhiḥ //

pakvāśayasthapavano hy asthimajjagatastathā /(ṃadhukośa on ṃṇ2.38)) kupitaḥ kopayatyāśu śleṣmāṇaṃ pittam eva ca //

sa gambhīrasamutpattisthānatantratrayo mahān /
anyedyuṣkaikāntaritau kuryād vāpi caturthakam //

majjānamasthi medaś ca dūṣayetprathame ' hani /
dvitīye ' hani samprāpte dūṣayenmāṃsaśoṇitam //

tatastṛtīye divase dūṣayet kaphamārutau /
abhigamya tataḥ pittaṃ dūṣayet tu caturthake //

jvaro ' yaṃ prāṇināṃ dehe raudro māheśvaras tathā /
prayateta praśāntau tu tasmād asya vicakṣaṇaḥ //

gambhīrasthānasambhūto dhātusaṃkaradūṣitaḥ /
tasmāc caturthako nāma duścikitsyatamo mataḥ //

śoṣayatyeṣa bhūtāni dāruṇo viṣamajvaraḥ /
tasmāc choṣopacāreṇa kuryāt tasya cikitsitam //

triphalākvāthasiddhena ghṛtena matimān bhiṣak /
snehayet taṃ yathānyāyaṃ yuktyā vṛṣaghṛtena vā //

sraṃsayet tamadhobhāgaṃ yathāvyādhibalābalam /
doṣeṣvāmāśayastheṣu kārayed vamanaṃ bhiṣak //

āsthāpanaṃ ca kurvīta tathā cāpy anuvāsanam /
etanmahāpañcagavyaṃ vikhyātaṃ sarpiruttamam //

caturthakaṃ mokṣayati mantrasiddhiyuto yathā /
śvayathuṃ pāṇḍurogaṃ ca plīhānaṃ sabhagandaram //

udarāṇi tathā gulmān kāmilāṃ cāpakarṣati //

śakṛdrasaṃ payo mūtraṃ dadhi sarpiś ca pāyayet /
tatpañcagavyaṃ śamayecchvayathuṃ pāṇḍutāṃ jvaram //

samūlapatraśākhasya śataṃ kṛtvā vṛṣasya tu /
jaladroṇe vipaktavyamaṣṭabhāgāvaśeṣitam //

garbheṇa vṛṣapuṣpāṇāmāḍhakaṃ sarpiṣaḥ pacet // tatsiddhaṃ pāyayed yuktyā madhupādasamanvitam //

kāsaṃ śvāsaṃ pāṇḍurogaṃ tṛtīyakacaturthakau /
raktapittaṃ kṣayaṃ caiva vṛṣasarpirniyacchati //

nāgaraṃ saindhavaṃ cavyaṃ pippalīkṣāracitrakau /
eteṣāṃ palikairbhāgairghṛtaprasthaṃ vipācayet //

kṣīraprasthena saṃyojya śanairmṛdvagninā pacet /
etena gulmāḥ śāmyanti kuṣṭhāni jaṭharāṇi ca //

jvare ca viṣame peyaṃ plīhaśvayathumehinām /
śūle pāṇḍvāmaye caiva grahaṇīdīpaneṣu ca //

ūrdhvavātāś ca ye kecitsarveṣāmauṣadhaṃ param /
tryūṣaṇaṃ citrakaṃ hiṃsrāṃ vilaṅgāni harītakīm //

vibhītakānyāmalakaṃ cirabilvatvacaṃ tathā /
daśaitāni samāṃśāni ślakṣṇānyakṣasamāni ca //

taiḥ pācayed dhṛtaprasthaṃ samyak payasi ṣaḍguṇe /
grahaṇī dīpyate tena vātagulmaś ca śāmyati //

arśasāṃ śamanaṃ caiva gudaśophe ca pūjitam /
etad eva hi vai śreṣṭhamudāvarte ghṛtaṃ bhavet //

darbhavetasamūlāni candanaṃ madhukaṃ balā /
phenilā padmakośīramubhe ca kamalotpale //

kiṃśukaśceti bhāgāḥ syuḥ pṛthak pañcapalonmitāḥ /
jaladroṇe vipaktavyaṃ caturbhāgāvaśeṣitam //

jīvakarṣabhakau medāṃ lodhraṃ lāmajjakaṃ tathā /
kāleyakaṃ sapriyakaṃ dadyāt kesaram eva ca //

tripuṇḍarīkaṃ lodhraṃ ca padmakaṃ padmakesaram /
surabhiṃ kuṅkumaṃ caiva mañjiṣṭhāṃ madayantikām //

mācipatraṃ ca tulyāni dviguṇaṃ kuṅkumaṃ bhavet /
caturguṇāṃ ca mañjiṣṭhāṃ sauvīraṃ snehasammitam //

tailaprasthaṃ pacettena kaṣāyeṇārdhapeṣitam /
etadabhyañjanaṃ tailaṃ viṣamajvaranāśanam //

mahāpadmakam ākhyātam etat sarvajvarāpaham /
vātapittodbhavaṃ kṣipraṃ jvarametanniyacchati //

trāyamāṇāṃ jayāṃ vīrāṃ nākulīṃ gandhanākulīm /
kāyasthāṃ ca vayaḥsthāṃ ca jīrakaṃ sapalaṅkaṣam //

chatrāticchatrajaṭilāṃ sūkarīṃ karkaṭīṃ tathā /
cāraṭīṃ pūtanāṃ keśīṃ vacāṃ kaṭukarohiṇīm //

mahāpuruṣadantāṃ ca vṛścikālīṃ kaṭambharām /
sthirāṃ ca piṣṭvā taissiddhaṃ caturthakavināśanam //

mahāpaiśācikaṃ nāma sarpiretajjvarāpaham /
bhūtagrahānapasmārānunmādāṃś cāpakarṣati //

etair eva uṣadhagaṇaiḥ pradehaṃ kārayed bhiṣak /
dhūpayejjvaritaṃ caiva tathā sampadyate sukhī //

balayaḥ śāntikarmāṇi homasvastyayanāni ca /
snānāni copavāsaś ca śamayanti caturthakam //

sraṣṭāraṃ cāsya rogasya bhūtādhipatimacyutam /
pūjayaṃś cābhigacchec ca śmaśāne vṛṣabhadhvajam //

bhūtavidyāsamutpannairbandhanaissādhanair api /
homairbalividhānaiś ca nāśayed viṣamajvaram // ity āha bhagavān ātreyaḥ /
iti bhele cikitsite dvitīyo ' dhyāyaḥ // // tṛtīyo ' dhyāyaḥ // athāto raktapittacikitsitaṃ vyākhyāsyāma iti ha smāha bhagavān ātreyaḥ /