Bhela Samhita · Chapter 6.19

sarvāṇy etāni liṅgāni dṛśyante marmarogiṇaḥ /
sannipātasamuttho ' sau naiva sidhyati karmaṇā //

nirbhidyate devanārtaṃ dahyate marma dūyate /
bhaktadveṣo jvaro mūrcchā śvāsaś ca paritapyate //

bhinnavarṇo ' tha dīnaś ca hṛdi kaṇḍūś ca jāyate /
hṛdrogaḥ krimijaḥ proktaḥ pañcamassa tu durjayaḥ //

sādhyāstrayas tu hṛdrogā vātapittakaphātmakāḥ /
dvau cāsādhyau smṛtau tatra sādhyānāṃ śṛṇu bheṣajam //

hṛdrogiṇaṃ snehayitvā śamayecchodhayet tathā /
laṅghayed acirottyaṃ taṃ hṛdrogaṃ vātikādvinā //

harītakī vacā rāsnā pippalyau viśvabheṣajam /
śaṭhī puṣkaramūlaṃ ca cūrṇaṃ hṛdroganāśanam //

pāṭhāvacāyavakṣārā abhayā cāmlavetasam /
durālabhā citrakaṃ ca tryūṣaṇaṃ lavaṇatrayam //

śaṭhī puṣkaramūlaṃ ca tintriṇīkaṃ sadāḍimam /
mātuluṅgyāś ca bījāni sūkṣmacūrṇāni kārayet //

sukhodakena madyair vā cūrṇāny etāni pāyayet /
arśaḥ śūlaṃ sahṛdrogaṃ gulmaṃ cāpi vyapohati //

sauvarcalaṃ śṛṅgaberaṃ dāḍimaṃ sāmlavetasam /
śvāsahṛdrogaśamanam idaṃ syāddhiṅgupañcamam //

pañcāśadabhayākalkaṃ pale sauvarcalasya ca /
caturguṇajale mukhyaṃ ghṛtaprasthaṃ vipācayet //

etadvallabhakaṃ nāma prāṇināṃ sarpiruttamam /
amṛtapratimaṃ sṛṣṭaṃ śvāsahṛdroganāśanam //

pibetkalyāṇakaṃ sarpirdhānvantaramathāpi vā /
mātuluṅgasya ca rasaṃ pibetkṣārāgadānapi //

śatapākaṃ balātailaṃ śairīṣaṃ sukumārakam /
tailāny etāni seveta sadā hṛdgadapīḍitaḥ //

pibedrasāyanaṃ sarpiḥ kṣīrāṇi ca guḍānapi /
pittahṛdrogaśamanā ye coktā ghṛtamodakāḥ //

jīvakarṣabhakau drākṣā śarkarā śreyasī balā /
dve mede dve ca kākolyau kharjūryasitamutpalam //

ghṛtaprasthaṃ pacedebhiḥ tulyāṃśairmāhiṣaṃ bhiṣak /
caturguṇena payasā pātavyaṃ yuktitaś ca tat //

vātapittasamutthāne hṛdroge nāśanaṃ param /
vasā lābhena majjā ca tulyaṃ tailaghṛtaṃ tathā //

amūni lābhato dadyādatha cāpi caturguṇam /
vacā trikaṭukaṃ rāsnā jīvantī jīvako balā //

nidigdhikā cāṃśumatī nīlī bhārṅgīṃ punarnavā /
siddhamebhir mahāsnehaṃ balamālokya pāyayet //

hṛdrogaṃ vātikaṃ snehaḥ sadya eva cikitsati /
vicārayetsvayaṃ buddhyā vaidyo hṛdrogabheṣajam //

madhuraṃ pittahṛdroge snigdhamuṣṇaṃ ca vātike /
trayas tu pariśeṣā ye tīkṣṇoṣṇaistānupācaret //

kṣāraiḥ kṣārāgadaiś caiva vamanaissavirecanaiḥ /
cikitsitaṃ vistareṇa yaduktaṃ kṛmikoṣṭhinām //

tadeva krimihṛdroge kartavyamanasūyayā /
audakānūpamāṃsāni dadhi dugdhaṃ guḍo rasaḥ //

abhiṣyandakaraṃ sarvaṃ vātahṛdroganāśanam /
etānyeva tu śeṣeṣu hṛdrogeṣu vivarjayet /
laghūni cānnapānāni śasyante teṣu sarvadā // ity āha bhagavān ātreyaḥ /
iti bhele ekonaviṃśo ' dhyāyaḥ // // viṃśo ' dhyāyaḥ // athātaḥ kāsacikitsitaṃ vyākhyāsyāma iti ha smāha bhagavān ātreyaḥ /