Bhela Samhita · Chapter 6.14

vaṃśako naktamālaś ca mūrvā kaṭukarohiṇī /
tarkārī pragrahaś caiva pīlūni niculāni ca //

asanaḥ sptaparṇaś ca triphalā maricāni ca /
etāni samabhāgāni kaṣāyam upapādayet //

etānyeva ca cūrṇāni mākṣikeṇa piben naraḥ /
anenaiva kaṣāyeṇa bhojayet siddhamodanam //

picumandasya mūlāni citrako hastipippalī /
tvakpatraphalamūlāni karañjātsarṣapās tathā //

tulyāny etāni sarvāṇi valmīkasya ca mṛttikā /
gavāṃ mūtreṇa piṣṭāni ślakṣṇānyudvartanaṃ varam //

rāsnā vacā hy arkamūlaṃ hiṃsrā dantī tathaiva ca /
śatapuṣpā ca kuṣṭhaṃ ca dve haridre punarnavā //

aśvamūtre tvapāmārgaḥ śārivā naktamālikā /
valmīkamṛttikā yuktametair udvartanaṃ varam //

karajassuraso bilvaṃ devadāru vacārjunaḥ /
tarkārī meṣaśṛṅgī ca śobhāñjanaka āraṇī //

ubhe bṛhatyau śyonākaḥ śbadaṃṣṭrā khadirāsanau /
jale siddhairimaisttulyaiḥ kaṣāyapariṣecanam //

etair eva uṣadhaistulyaiḥ kṣīrapiṣṭaṃ pralepayet /
anena vidhinā śīghramūrustambhaḥ praśāmyati //

dve pañcamūlyau triphalā citrako devadāru ca /
ekāṣṭhīlā tvapāmārgaḥ śreyasī vāyasī sudhā //

kālā bhārṅgī pṛthakparṇī suvahā madayantikā /
kāśmarī ca viśalyā ca hiṃsrā hemavidārikā //

cirabilvo hy aśokaś ca balā cāṃśumatī tathā /
vayasthā pīlaparṇī ca pāṭhā caiva śatāvarī //

eṣāṃ paṃcapalān bhāgān jaladroṇeṣu saptasu /
aṣṭabhāgāvaśeṣaṃ ca pacettailāḍhakaṃ śanaiḥ //

kuṣṭhaṃ ca śatapuṣpā ca citrakastryūṣaṇaṃ tathā /
devadārvagaru śreṣṭhaṃ viḍaṅgaṃ mustam eva ca //

aśvagandhā ca pāṭhā ca mūrvā śyonāka eva ca /
pippalyaḥ śṛṅgaberaṃ ca dantī hiṅgvamlavetasau //

garbheṇānena vaidyas tu kaṣāyeṇa susādhayet /
siddhaṃ pūtaṃ ca śītaṃ ca kṣaudrājyenānusaṃsṛjet //

tadasya dadyāt pānārthaṃ tathaivābhyajjanādiṣu /
ūrustambhaścirotpannastailenaitena śāmyati //

ślīpadānyāṭhyavātaṃ ca khuḍavātāṃś ca nāśayet /
pippalīvardhamānaṃ vā mākṣikeṇa jalena vā //

ūrustambhe praśaṃsanti gaṇḍīrāriṣṭam eva vā /
kṣārāḥ kṣārāgadāś caiva nirūhāś ca pṛthagvidhāḥ //

harītakyāḥ prayogo vā hyūrustambhe praśasyate /
vilekhyamāno hi yataḥ kṣīṇamāṃsabalo bhavet //

śarīrarakṣaṇārthāya bhojayed bṛṃhayed api /
bhuñjīta ṣaṣṭikān jīrṇān purāṇāṃś caiva śālikān //

jāṅgalāni ca māṃsāni seveta mṛgapakṣiṇām /
ūrustambhaparīto yo yadā vātādhiko bhavet //

samyak proktam idaṃ sarvamūrustambhacikitsitam // ity āha bhagavān ātreyaḥ /
iti bhele caturdaśo ' dhyāyaḥ // // pañcadaśo ' dhyāyaḥ /
/
athāto visarpavātaśoṇitaṃ vyākhyāsyāma iti ha smāha bhagavān ātreyaḥ /