Bhela Samhita · Chapter 6.12
tālapatrīkaṣāyaṃ tu mūtrāghāteṣu dāpayet /
bhojanaṃ krauñcamāṃsena mūtrāghāteṣu śasyate //
piṣṭvā tu tasya caivāsthi kṣīreṇa saha pāyayet /
mūtrakṛcchrāṇi śamayed aśmarīṃ ca bhinatty api //
ebhir yadi prayogais tu śarkarā nopaśāmyati /
tāmuddharecchalyahartā dṛṣṭakarmā bahuśrutaḥ //
pratīghātādindriyasya yasya kṛcchraṃ pravartate /
anusannaṃ ca śūlaṃ ca śṛṇu tasya cikitsitam //
balātailena svabhyaktamuṣṇāmbupariṣecitam /
āsthāpayetpācanena mustādyena tu vastinā //
pratyāgate nirūhe taṃ bhojayet siddhamodanam /
tanunā mudgayūṣeṇa jāṅgalena rasena vā //
tatas tu śuddhāmbarayā nāryā snātānuliptayā /
iṣṭayā saṃviśetsārdhaṃ kalyāṇaguṇayuktayā //
viśuddhe retaso mārge mārutaḥ praguṇī bhavet /
svaṃ sthānaṃ mārute prāpte kṛcchraṃ tasya nivartate //
aṣṭānāṃ mūtrakṛcchrāṇāmetaduktaṃ cikitsitam /
rūpāṇi caiva sarveṣāṃ śiṣyāṇāmarthasiddhaye // ity āha bhagavān ātreyaḥ /
iti bhele dvādaśo ' dhyāyaḥ // // trayodaśo ' dhyāyaḥ // athāta udaracikitsāṃ vyākhyāsyāma iti ha smāha bhagavān ātreyaḥ /
Original text: Bhelasaṃhitā · Edition: ed. V. S. Venkatasubramania Sastri and C. Raja Rajeswara Sarma (CCRAS, New Delhi); e-text by SARIT · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0