ભેલસંહિતા · અધ્યાય 6.12

તાલપત્રીકષાયં તુ મૂત્રાઘાતેષુ દાપયેત્ ।
ભોજનં ક્રૌઞ્ચમાંસેન મૂત્રાઘાતેષુ શસ્યતે ॥

પિષ્ટ્વા તુ તસ્ય ચૈવાસ્થિ ક્ષીરેણ સહ પાયયેત્ ।
મૂત્રકૃચ્છ્રાણિ શમયેદ્ અશ્મરીં ચ ભિનત્ત્ય્ અપિ ॥

એભિર્ યદિ પ્રયોગૈસ્ તુ શર્કરા નોપશામ્યતિ ।
તામુદ્ધરેચ્છલ્યહર્તા દૃષ્ટકર્મા બહુશ્રુતઃ ॥

પ્રતીઘાતાદિન્દ્રિયસ્ય યસ્ય કૃચ્છ્રં પ્રવર્તતે ।
અનુસન્નં ચ શૂલં ચ શૃણુ તસ્ય ચિકિત્સિતમ્ ॥

બલાતૈલેન સ્વભ્યક્તમુષ્ણામ્બુપરિષેચિતમ્ ।
આસ્થાપયેત્પાચનેન મુસ્તાદ્યેન તુ વસ્તિના ॥

પ્રત્યાગતે નિરૂહે તં ભોજયેત્ સિદ્ધમોદનમ્ ।
તનુના મુદ્ગયૂષેણ જાઙ્ગલેન રસેન વા ॥

તતસ્ તુ શુદ્ધામ્બરયા નાર્યા સ્નાતાનુલિપ્તયા ।
ઇષ્ટયા સંવિશેત્સાર્ધં કલ્યાણગુણયુક્તયા ॥

વિશુદ્ધે રેતસો માર્ગે મારુતઃ પ્રગુણી ભવેત્ ।
સ્વં સ્થાનં મારુતે પ્રાપ્તે કૃચ્છ્રં તસ્ય નિવર્તતે ॥

અષ્ટાનાં મૂત્રકૃચ્છ્રાણામેતદુક્તં ચિકિત્સિતમ્ ।
રૂપાણિ ચૈવ સર્વેષાં શિષ્યાણામર્થસિદ્ધયે ॥ ઇત્ય્ આહ ભગવાન્ આત્રેયઃ ।
ઇતિ ભેલે દ્વાદશો ઽ ધ્યાયઃ ॥ ॥ ત્રયોદશો ઽ ધ્યાયઃ ॥ અથાત ઉદરચિકિત્સાં વ્યાખ્યાસ્યામ ઇતિ હ સ્માહ ભગવાન્ આત્રેયઃ ।