Bhela Samhita · Chapter 5.9

cūrṇaṃ śirasi yasyaiva śuṣkagomayasannibham /
snehino dṛśyate jantormāsāddehaṃ jahāti saḥ //

kṛśasya kapharogeṇa yasya śleṣmaparikṣayaḥ /
karṇau raktau mukhaṃ caiva dvau māsau nātivartate //

yasya lohitakābhāsamambu tāluni dṛśyate /
kṣīṇalohitamāṃsasya sa māsaṃ nātivartate //

arundhatīṃ na paśyet tu sthitāṃ saptarṣisaṃsadi /
sa māsādaṣṭamānmartyaḥ kṣipraṃ prāṇairvimucyate //

aṇukābhiś ca kṛṣṇābhir āsyaṃ jihvā ca tāluke /
sarvatassamanucchinnaṃ na sa jīvati tādṛśaḥ //

śīrṣābhitāpino yasya śleṣmarogavatas tathā /
hikkā viniṣyandate vai nāyamastīti nirdiśet //

yasya lomāni keśāś ca pluṣyantīva śarīriṇaḥ /
saṃhṛṣṭānīva vā dehī na sa jīvati tādṛśaḥ //

yasya kālāntare dantā dṛśyante raktasannibhāḥ /
niṣprabhāś cānuliptā vā na sa jīvati tādṛśaḥ //

kṣāreṇa vidhṛtaṃ gātraṃ dṛśyate yasya dehinaḥ /
samamuṣṇe ca śīte ca na sa jīvati tādṛśaḥ //

gātreṣu kharavarṇeṣu yasya vārilavaplavaḥ /
anabhyakteṣu gātreṣu na sa jīvati tādṛśaḥ //

śūlamaṅge bhavedyasya sphuṭitaṃ raktamāsravet /
adho golakasaṃkāśaṃ paretaṃ tasya jīvitam //

āpāṇḍu madhumehe tu yaś ca mehati mānavaḥ /
abhyantareṇa pañcāhātsa pañcatvaṃ hi gacchati //

aratiś cāvipākaś ca kārśyadaurbalyam eva ca /
yasya saṃdṛśyate jantorna sa jīvati tādṛśaḥ //

yas tu dīnamanātho vā balena parihīyate /
bhidyāmārogamāpnoti yathā pretas tathaiva saḥ //

anuvṛttau yathā jantuḥ pittena parimūrcchitaḥ /
saṃmūḍhavākyo bhavati yathā pretas tathaiva saḥ //

yas tv āsane ' tha śayane ratiṃ na labhate naraḥ /
sa śīghraṃ kurute kālaṃ yaś ca sāśrūṇi khādati //

āruhya vānaraṃ yas tu saṃkalpaṃ nāvabudhyate /
tam āhuḥ paralokāya svapne tu kuśalā narāḥ //

parisaṃvatsarādyasya jvaro nāpaiti dehinaḥ /
uṣṇo vā yadi vā śīto yathā pretas tathaiva saḥ //

yasya jātapramehasya piṭakā pāṇḍurā bhavet /
sopadravā śatapadā yathā pretas tathaiva saḥ //

yasyor dhvaṃ kramate vāyuḥ śrotraṃ vādhaḥ pravartate /
sarvāṇi ca prabhidyante yathā pretas tathaiva saḥ //

ity etairlakṣaṇairyuktaṃ bhiṣak dṛṣṭvaiva mānavam /
nopakramettathā vīra rakṣannātmayaśaḥ sphuṭam // ity āha bhagavān ātreyaḥ /
iti bhele indriye navamo ' dhyāyaḥ // // daśamo ' dhyāyaḥ // athātaśchāyādhyāyaṃ vyākhyāsyāma iti ha smāha bhagavān ātreyaḥ /