Bhela Samhita · Chapter 5.10

anucchāyāthavā jantordṛḍhacchāyāthavā punaḥ /
vicchinnā yasya vā chāyā na sa jīvati tādṛśaḥ //

yo vidyutamivākāśe vyabhre paśyati mānavaḥ /
dhūmāyate śiraśchāyā yasya nāstīti taṃ viduḥ //

lākṣāraktaṃ yathā vastramevaṃ paśyati yo mahīm /
athavā raktamākāśaṃ raktapittena hanyate //

yo hṛṣṭaromā puruṣaḥ kāsena śleṣmaṇācitaḥ /
kaṇṭhaś ca śūkānugato yasya nāstīti taṃ viduḥ //

yasya śaṅkhāccyutaṃ māṃsaṃ śyāve netre tathaiva ca /
cūrṇakaś ca mukhe jātaḥ paretaṃ tasya jīvitam //

yasya hastāccyutaṃ māṃsaṃ jantordṛśyeta kuṣṭhinaḥ /
athāviprayuktasya na sa jīvati mānavaḥ //

avipakvaṃ vipakvaṃ vā bhuktaṃ bhuktaṃ yathā bhavet /
kāśaśvāsajvaraiḥ spṛṣṭo nāsti tasya cikitsitam //

hṛdayaṃ pūrvamāvāti yasya snātasya dehinaḥ /
ardhamāsātparaṃ tasya jīvitaṃ nātivartate //

ūrdhvaśvāsahato yas tu raktaṃ pracchardayen naraḥ /
śūlaṃ vā bhinnakoṣṭhasya na sa jīvati mānavaḥ //

antardāho ' dhiko yasya śītārtiś cāpi bāhyataḥ /
ākāśaṃ paripūrṇaṃ vā vetti yo na sa jīvati //

yasya pakvāvubhāvoṣṭhau nīlau jambūphalopamau /
ucchūnaṃ yasya ca śiraḥ paretaṃ tasya jīvitam //

yasyocchūnaṃ bhavenmadhyamubhāvaṃsau kṛśau tathā /
viriktaḥ punarādhmāti yathā pretas tathaiva saḥ //

etadindriyavijñānaṃ yassamyaganupaśyati /
sa jīvitaṃ ca mṛtyuṃ ca nṛṇāṃ vidyādbhiṣagvaraḥ // ity āha bhagavān ātreyaḥ /
iti bhele indriye daśamo ' dhyāyaḥ // // ekadaśo ' dhyāyaḥ // athātaḥ puṣpīyaṃ vyākhyāsyāma iti ha smāha bhagavān ātreyaḥ /