Bhela Samhita · Chapter 5.8

tṛṇānnakhānvā chindan vai bhiṣajaṃ paripṛcchati /
āturasya yadā dūtaḥ pratyākhyeyastathāvidhaḥ //

viplutaṃ bhāṣamāṇaś ca bhiṣajaṃ paripṛcchati /
āturasya yadā dūtaḥ pratyākhyeyastathāvidhaḥ //

bhinatti kāṣṭhaṃ kāṣṭhena loṣṭaṃ loṣṭhena vāpy adhaḥ /
āturasya yadā dūtaḥ pratyākhyeyastathāvidhaḥ //

spṛśannaṅgāni bālāṃś ca bhiṣajaṃ paripṛcchati /
āturasya yadā dūtaḥ pratyākhyeyastathāvidhaḥ //

pidhāya pāṇinā nābhiṃ bhiṣajaṃ paripṛcchati /
āturasya yadā dūtaḥ pratyākhyeyastathāvidhaḥ //

kapālikāṃ śarkarāṃ vā bhinattyaṅgārikām api /
āturasya yadā dūtaḥ pratyākhyeyastathāvidhaḥ //

āste bhūmau pariśrānto gṛhṇātyaṅgamatha bhraman /
āturasya yadā dūtaḥ pratyākhyeyastathāvidhaḥ //

naṣṭaṃ mṛtamatikrāntaṃ nānuśocanti paṇḍitāḥ /
ity āturasya hi yadā vadeddūto na so ' sti vai //

karaṃ kareṇa gṛhṇāti pāṇinā tāḍayetkaram /
āturasya yadā dūtaḥ pratyākhyeyastathāvidhaḥ //

khādedoṣṭhau ca jihvāṃ ca nakhān dantaiś ca kalpayet /
āturasya yadā dūtaḥ pratyākhyeyastathāvidhaḥ //

āturasya yadā gehe vaidye vai paryupasthite /
chidyate bhidyate caiva pratyākhyeyastathāvidhaḥ //

parāvartya ghaṭaṃ pūrṇaṃ brāhmaṇaṃ paripṛcchati /
āturasya yadā dūtaḥ pratyākhyeyastathāvidhaḥ //

gṛdhraḥ sṛgālaḥ kākaś cāpy ulūko vāyasas tathā /
nadeyurdakṣiṇe pārśve rogiṇo yasya nāsti saḥ //

kaṣāyavastro muṇḍo vā jaṭilo vātha nagnakaḥ /
carmabhir vā parivṛto, mahānasyeva śāṭikaḥ //

tailābhyaktaśchinnanāso vāgmī conmatta eva vā /
bhagnauṣṭhaḥ kharavāṭo vā na dūtaḥ sampraśasyate //

iti dūtasamācāro vyādhitānāṃ prakīrtitaḥ /
ya evaṃ veda nipuṇaṃ siddhikāmaḥ sa vai bhiṣak // ity āha bhagavān ātreyaḥ /
iti bhele indriye aṣṭamo ' dhyāyaḥ // // navamo ' dhyāyaḥ // athāto gomayacūrṇaṃ vyākhyāsyāma iti ha smāha bhagavān ātreyaḥ /