Bhela Samhita · Chapter 5.6

antarlohitakāyas tu bahiḥ pāṇḍuḥ prakāśate /
pūrvarūpaṃ tadācaṣṭe mānavasya mumūrṣataḥ //

bahirlohitakāyas tu pāṇḍurantaḥ prakāśate /
pūrvarūpamanuprāptaḥ sa mṛtyor ucyate naraḥ //

antarglāno bahiḥ pīno bahirādhmāta eva ca /
yaś cātyantasamādhmātaḥ sarve ' pyete parāsukāḥ //

abhīkṣṇaṃ jvaryate yas tu nivātamabhinandati /
anuṣaktapratiśyāyaḥ kṣipraṃ śvāsena hanyate //

ninādī vā pralāpī vā hasatyatyartham eva ca /
unmādena kṛśo jantuḥ pañcatvam upagacchati //

ghanaṃ saśūlaṃ yo veda sadāhaṃ hṛdayaṃ naraḥ /
hṛdrogeṇa kṛśo janturvināśam upagacchati //

prasvidyate ca kaṇḍūmān yo viruddhaṃ ca sevate /
avirecanaśīlaś ca kuṣṭhena sa vinaśyati //

sukumāraś ca yo jantuḥ snehaṃ māṃsaṃ ca sevate /
divā svapiti cābhīkṣṇaṃ sa pramehī vinaśyati //

pariśūnaś ca yo jantuḥ svede ca paruṣacchaviḥ /
bhinnaṃ yaścopaviśati so ' tisāreṇa hanyate //

yasyāgniś ca balaṃ caiva nālpaṃ bhavati dehinaḥ /
kṣīṇalohitamāṃsasya yathā pretas tathaiva saḥ //

sadyo raktaṃ śiro yasya pītakaṃ vā pradṛśyate /
kapilaṃ pluṣṭakeśaṃ vā yathā pretas tathaiva saḥ //

yasya netre lalāṭaṃ ca mukhaṃ nāsāṃ bhruvau tathā /
jihmāni kurute vāyuryathā pretas tathaiva saḥ //

śyāvā kaṇṭakinī jihvā yasya śuṣkā pradṛśyate /
śyāve netre nakhāś cāpi yathā pretas tathaiva saḥ //

yasya nirbhidyate kaṇṭhaḥ tāmyatyuccaiśśarīriṇaḥ /
bahirāyāmabhājastaṃ pratyācakṣīta paṇḍitaḥ //

yasyor dhvakāye balavān navo rogas tu duṣkriyaḥ /
pūrvarūpaṃ tathā vācyaṃ mānavasya mariṣyataḥ //

yasya cucchundarīgandhaḥ puruṣasya bhavatyatha /
sauvarṇānapi vṛkṣāṃś ca yo veda sa vinaśyati //

ity ebhir īdṛśaiś cānyairvikārairvarṇitaṃ naraḥ /
nopakrameta medhāvī ya icchedātmanaḥ sukham // ity āha bhagavān ātreyaḥ /
iti bhele indriye ṣaṣṭho ' dhyāyaḥ // // saptamo ' dhyāyaḥ // athāta indriyāṇīkamindriyaṃ vyākhyāsyāma iti ha smāha bhagavān ātreyaḥ /