Bhela Samhita · Chapter 5.5

yasya śyāve ume netre dṛśyete harite tathā /
utpannaś ca śirorogaḥ phalitaṃ tasya jīvitam //

haritāś ca sirā yasya romakūpāś ca lohitāḥ /
bhuṅkte vānnāni sāmlāni tatraiva sa vinaśyati //

yasyor dhvavātaḥ kopena jantorāmāśayaṃ gataḥ /
hṛdayaṃ parigṛhṇāti paretaṃ tasya jīvitam //

gātre ca pāṇipāde ca yasya śuṣyati śoṇitam /
muhurmuhurnṛtyati ca paretaṃ tasya jīvitam //

vṛṣaṇau pāṇipādau ca yasya śuṣkaṃ mukhaṃ tathā /
chaviś ca śoṣam āyāti paretaṃ tasya jīvitam //

hanū hastau ca pādau ca vṛṣaṇau liṅgam eva ca /
dṛśyate dehino yasya paretaṃ tasya jīvitam //

hṛdayaṃ dahyate yasya mumūrṣuṃ taṃ samādiśet /
āturas tu sa yāto vai paretaṃ tasya jīvitam //

apasmāraḥ kṣayaḥ kuṣṭhaṃ raktapittamathodaram /
gulmaś ca madhumehaś ca dīrgharogā bhavanti te //

balamāṃsakṣayo yasya dehino dīrgharogiṇaḥ /
dṛśyeta svarahāniś ca paretaṃ tasya jīvitam //

hṛdayaṃ dahyate yasya koṣṭhe śūlaṃ svarakṣayaḥ /
abhīkṣṇaṃ dahyate cāpi paretaṃ tasya jīvitam //

trāsābhitāpā jantūnāṃ koṣṭhe śūlāścaranti ca /
hikkācchardiparītaś ca paretaṃ tasya jīvitam //

vāpitaṃ jvalitaṃ martyaḥ, salilaṃ hi hutāśanam /
bhāskaraṃ manyate somaṃ durlabhaṃ tasya jīvitam //

yaś cāpi vimale sūrye meghān paśyati sarvaśaḥ /
durdinaṃ sudinaṃ cāpi paretaṃ tasya jīvitam //

yaṃ rasā nāvatiṣṭhante bheṣajaṃ cendriyāṇi tu /
yasya vā viparītāni na ca jīvati tādṛśaḥ //

vānaspatyaphalaṃ mūlaṃ rogaspṛṣṭasya yasya vai /
bhaiṣajyārthaṃ na dṛśyeta na ca jīvati tādṛśaḥ //

ity etāni bhiṣag dṛṣṭvā lakṣaṇāni mumūrṣatām /
na cikitsāṃ prayuñjīta yaśomārgapratīkṣayā // ity āha bhagavān ātreyaḥ /
iti bhele indriye pañcamo ' dhyāyaḥ // // ṣaṣṭho ' dhyāyaḥ // athātaḥ pūrvarūpīyaṃ vyākhyāsyāma iti ha smāha bhagavān ātreyaḥ /