Bhela Samhita · Chapter 5.11

śirasyaṅge raktavarṇaṃ yo ' nilaṃ vāpi paśyati /
ghaṭikāmekavarṇaṃ vā sa puṣpita ihocyate //

aṣṭāpadaṃ vā sukṛtaṃ jagatīṃ yaḥ prapaśyati /
sa dṛṣṭiparihīnatvāt puṣpitaḥ procyate naraḥ //

suptaś ca saṃvṛte gehe paśyatyākāśam eva yaḥ /
romanthayati dantaiś ca sa puṣpita ihocyate //

dīpyamānamivākāśaṃ pṛthivīṃ ca vanāni ca /
yo vetti romasaṃhṛṣṭaḥ puṣpitaḥ sa ihocyate //

anullipto yathā dehī vāti cetkuṇapaṃ yathā /
sevante makṣikāś caiva puṣpitaḥ sa ihocyate //

avijñātā naraṃ nārī svapna eva nivāsinī /
dakṣiṇāṃ diśamehīti yaṃ brūyānna sa jīvati //

prakīrṇakeśo vikaraḥ svapne yo dakṣiṇāṃ diśam /
pratipadyeta tatraiva na sa jīvati tādṛśaḥ //

kuśair iva nirūḍhāṅgamātmānaṃ svapna īkṣate /
khaṃ vā sadhūmaṃ yo vetti na sa jīvati tādṛśaḥ //

yaḥ svapne vṛkṣamāruhya na rogī trāyate gṛhe /
prakīrṇakeśo vikacaḥ yo ' gnimāruhya roditi //

prāsādamekasthūṇaṃ tu svapne yaś cādhirohati /
naro nṛtyati paṅke vā sa pumānna ca jīvati //

svapne prāsādamāruhya mahāntaṃ kāñcanaṃ tathā /
yo nṛttagītapānānnī na sa jīvati mānavaḥ //

gajenoṣṭreṇa vā gacchan yaḥ paśyeddakṣiṇāṃ diśam /
jīvet tu rogī saptāhaṃ, nīrogaḥ śaradāṃ śatam //

yāti yo durdine vāpi svapne vā dakṣiṇāṃ diśam /
pratibudhyeta tatraiva na sa jīvati tādṛśaḥ //

bhāsairbarhivarāhaiś ca śvabhir mahiṣavājibhiḥ /
samaṃ yo taddivā yone svapne yogaphalaṃ bhavet //

yadā gaṇḍaṃ ca khaḍgaṃ ca svapne cāśnaṃś ca paśyati /
prakīrṇakeśam api ca na sa jīvati tādṛśaḥ //

yaḥ svapne puruṣaḥ kālaṃ pītaṃ vā vastramṛcchati /
gāyannaceṣṭayanvāpi na sa jīvati tādṛśaḥ //

yaḥ svapne vītakāmo ' pi pītāṃ pibati vāruṇīm /
citrakaṇṭhaguṇo vāpi na sa jīvati tādṛśaḥ //

ākulāpāṃ nadīṃ svapne yovagāheta mānavaḥ /
jīvetsarogassaptāhaṃ, nīrogasśaradāṃ śatam //

svapne snātānuliptasya bhraṃśedyasya tu varṇakaḥ /
gātrasya puruṣasyeha sa śastreṇa vinaśyati //

etadindriyavijñānaṃ yassamyaganupaśyati /
jīvitaṃ caiva mṛtyuṃ ca nṛṇāṃ vidyādvicakṣaṇaḥ // ity āha bhagavān ātreyaḥ /
iti bhele indriye ekādaśo ' dhyāyaḥ // // dvādaśo ' dhyāyaḥ // athāto avākcitīyaṃ vyākhyāsyāma iti ha smāha bhagavān ātreyaḥ /