Bhela Samhita · Chapter 3.3

/.. /.. yasya bhuktaṃ vipacyate /
bhuñjānasyāpi cānnāni balaṃ varṇaś ca hīyate //

alpaṃ laghvapi yaccānnaṃ bhuktaṃ duḥkhena jīryati /
nāpnoti balavarṇau ca durbalāgniḥ sa ucyate //

kadācitpacyate bhuktaṃ kadācinna vipacyate /
guru vā laghu vā yasya viṣamāgniḥ sa ucyate //

mitaṃ pacyeta yasyānnamatibhuktaṃ na pacyate /
samāgniṃ taṃ naraṃ vidyāt samapittakaphānilam //

naro bhavati tīkṣṇāgniḥ prakṛtyā vātapaittikaḥ /
vātiko viṣamāgniśca, mandāgniś ca kaphān naraḥ //

yasya hīnādhikas tv agniḥ kṣipraṃ dehaṃ sa muñcati /
samāgniś ca samātmā yaḥ sa dīrghāyuṣṭvamṛcchati //

gavyamāhiṣavārāhaiḥ kulīrairmatsyakarkaṭaiḥ /
māṃsaissapalalaiḥ snigdhairatyagniṃ pratibhojayet //

godhāniṣkvathite kṣīre siddhaṃ bhuñjīta pāyasam /
pibeddadhi sasarpiṣkaṃ māṣasūpena miśritam //

tathā palalasammiśraṃ kacchapāṇḍarasaṃ pibet /
guḍaṃ ca tailasammiśraṃ kuryād anyac ca taddhitam //

snigdhasya viṣamāgnes tu vamanādīni kārayet /
grahaṇīdūṣaṇīyoktaṃ mandāgnes tu cikitsitam //

antarauṣadhapānāni bahirlepe ca yā kriyā /
śastrakarmavidhānaṃ ca bheṣajaṃ trividhaṃ smṛtam //

madhuro ' mlaḥ kaṭuś caiva paktimārgāstrayaḥ smṛtāḥ /
kaṭur bhavati pakvasya pacyamānasya cetarau //

ihānnapānaṃ bhojyaṃ ca madhurāmlaṃ pracakṣate /
vātajeṣu vikāreṣu yadā vā tairna śāmyati //

dadyādathāsmai snigdhāya bhiṣak snehavirecanam /
vastibhir vā cikitseta hyadhobhāge ca mārutaḥ //

tathā ca tiktamadhuraṃ pānamannaṃ pradāpayet /
paittikeṣu vikāreṣu yadi vātanna śāmyati //

tasya snigdhasya vamanaṃ śirasaś ca virecanam /
kuryād yathābalaṃ śleṣmā hyūrdhvabhāgaprakīrtitaḥ //

śakṛnmūtrānilāś caiva raktamāṃsādayaś ca ṣaṭ /
vidyānnibandhanānīti tāni deheṣu dehinām //

balaṃ vayaḥ śarīraṃ ca pratyekaṃ trividhaṃ smṛtam /
uttamādhamamadhyaṃ tu bhedenātha niśāmayet //

āhāraś ca vihāraś ca sevyamānau krameṇa tu /
kālena prakṛtiṃ yātas tad āhuḥ sātmyalakṣaṇam //
ity āha bhagavān ātreyaḥ / iti bhele vimāne tṛtīyo ' dhyāyaḥ // // caturtho ' dhyāyaḥ // athāto rogaprakṛtiviniścayaṃ vyākhyāsyāma iti ha smāha bhagavān ātreyaḥ /