Bhela Samhita · Chapter 2.7

yassadā śleṣmalo jantuḥ śleṣmalaṃ bhajate ' śanam /
sevate ca divāsvapnaṃ tasya śleṣmā pravardhate //

sa vṛddha ūrdhvaṃ hṛdayād gṛhītvā dhamanīrdaśa /
ruddhvā cetovahaṃ mārgaṃ saṃjñāṃ bhraṃśayate tataḥ //

sa bhraṣṭasaṃjñaḥ puruṣastāni tāni viceṣṭate /
gāyannṛtyati caikatra hasatyatha ca roditi //

ekatrāste vinā lokaṃ śete cāpi jaḍo yathā /
janaṃ bhīṣayate cāpi śleṣmonmādī pumāniha //

yas tv etat sarvamaśnāti yathoktaṃ doṣakopanam /
sannipātāttathonmādaṃ sarvaliṅgaṃ sa ṛcchati //

sa yadā dhananāśena maraṇena priyasya vā /
atha cintayate, tasya saṃjñā bhraśyati cintayā //

sa cintayati yān bhāvāṃstāneva pralapatyatha /
āgantuṃ pañcamaṃ vidyādity unmādaṃ śarīriṇām //

sarvān etān vijānīyādunmādānvai cikitsitāt /
duḥkhena saṃjñābhraṣṭo hi prakṛtiṃ punar ṛcchati //

evaṃ śarīrajā doṣāḥ śarīre paryavasthitāḥ /
śarīram eva hiṃsanti pāvakaḥ svamivāśrayam //

na hi satvāni hiṃsanti na piśācā na rākṣasāḥ /
devās tathā dharmaśīlāḥ madhyasthā manujānprati //

vamane recane yukto nirūhe cānuvāsane /
na jātu dāruṇān rogānunmādān prāpnuyān naraḥ // ity āha bhagavān ātreyaḥ /
iti bhele nidāne saptamo ' dhyāyaḥ // // aṣṭamo ' dhyāyaḥ // athāto ' pasmāranidānaṃ vyākhyāsyāma iti ha smāha bhagavān ātreyaḥ /