Bhela Samhita · Chapter 2.6

prakṛtiprabhavaś caiva narasya svakṛtas tathā /
jñeyaḥ prameho dvividhas tasya vakṣyāmi lakṣaṇam //

ślakṣṇāṅgā mṛdavaḥ snigdhā bhṛśaṃ śleṣmalamedurāḥ /
jātapramehā nardanti matsyamāṃsocitā narāḥ //

mātāpitṛbhyāmīdṛgbhyāṃ janito yas tu mānavaḥ /
medaḥśithilanāttasya prakṛtyā sa tu mehati //

anūpajānāṃ susnigdhairvividhaiś cāpi vārijaiḥ /
gavyājaurabhramāṃsaiś ca sadyo dadhnā ghṛtena vā //

guḍaprakāraiḥ payasā palalenaudakaiḥ khagaiḥ /
avyāyāmāddivāsvapnātsukhaśayyāsanāttathā //

ity ebhir īdṛśaiś cānyairmedaḥ snigdhaiḥ pravardhate /
medaḥ pravṛddhaṃ dehaṃ ca vastiṃ ca kledayaty api //

yassadā medasā klinnaḥ śleṣmalaṃ bhajate ' śanam /
tasya prakupitaḥ śleṣmā pramehān kurute daśa //

tad yathodakamehaṃ ca piṣṭamehaṃ tathaiva ca /
evamādīṃstathānyāṃś ca teṣāṃ vakṣyāmi lakṣaṇam //

sphaṭikāmbunibhaṃ mūtramudamehī pramehati /
śuklapiṣṭanibhaṃ cāpi piṣṭamehī pramehati //

kāṇḍekṣurasamehī ca mehatīkṣurasopamam /
mūtraṃ śuklopamaṃ cāpi śuklamehī tu mehati //

ity etāṃścaturo mehāñ jānīyāt kevalātkaphāt /
śleṣmaṇyanubale pitte ye mehanti tu tāñchṛṇu //

lavaṇāmbunibhaṃ mūtraṃ vidyāllavaṇamehinaḥ /
pramehati tathā jantussurāmehī surākṛti // mūtraṃ sāndraṃ prasannaṃ tu dṛśyate sāndramehinaḥ /
iti bhele nidāne ṣaṣṭho ' dhyāyaḥ // // saptamo ' dhyāyaḥ // .. .. gītāni bhajate nityaṃ pittonmādanipīḍitaḥ //