Bhela Samhita · Chapter 1.9

bheṣajaṃ hi catuṣpādamāturaṃ kurute ' gadam /
yunakti yaśasā vaidyamarthamapyasya yacchati //

tasmād auṣadhayogasya vaidyasyāpy āturasya ca /
upasthātuś ca vakṣyāmi sampadaṃ siddhikārikām //

prativātaṃ yathākṣiptaḥ pāṃsumuṣṭirvinaśyati /
tathā hi nāśamāgacchedṛte karma bhiṣakkṛtāt //

nadyāṃ prasyandamānāyāṃ śvabhrasthāne sthaleṣu ca /
praṇaśyati yathā vṛṣṭaṃ tathā duryojitāḥ kriyāḥ //

iṣvāsas tu yathā yukto dharmātmā khaḍgapāṇidhṛt /
parebhyaḥ kṣobham ādhatte pātyātmīyāṃś ca hantyarīn //

evaṃ cikitsakaḥ pādair bheṣajaiś copabṛṃhitaḥ /
rakṣatyakīrterātmānaṃ vyādhiṃ cāpi niyacchati //

sidhyati pratikurvāṇa ity ātreyasya śāsanam /
api cāpratikurvāṇa ity ākhyadbhadraśaunakaḥ //

guṇayuktāturadravyabhiṣakparicarānvitā /
dṛśyate viphalā yasmānnāphalā tu viparyaye //

tasmānnaikāntikī siddhiś catuṣpāde cikitsite /
na tvetāṃ buddhimātreyaśśaunakasyānumanyate //

pratikurvati siddhirhi varṇotsāhabalānvitā /
na ca syādvyādhibahutā na tvevāpratikurvati //

durvarṇo durbalaś ca syād vyādhibhiś cāpy upadrutaḥ /
vikalo vā bhavatyajñair upakrānta ivāturaḥ //

na sā siddhirasiddhiḥ syādyāṃ dṛṣṭvā nābhipadyate /
tasmāt jñānavatāṃ siddhiṃ vindeta matimān bhiṣak //

tatra prathamataḥ pādamauṣadhaṃ tu nibodha me /
khaṃ vāyuranalastoyaṃ bhūmiś caiveha pañcamī //

guṇottarāṇi sarvāṇi yathāsaṃkhyaṃ vibhāvayet /
teṣāntu ye bhūtaguṇāḥ pṛthagbhāvanidarśakāḥ //

parasparasamāyogāddravyeṣveva bhavanti te /
lakṣaṇaṃ khasya sauṣiryaṃ raukṣyaṃ cāpy anilātmakam //

auṣṇyamagnerapāṃ śaity aṃ kharatvaṃ pārthivo guṇaḥ /
yasminyasmin bhavelliṅgametaddravye viśeṣataḥ //

yasya bhūtasya taddravyaṃ tattadātmakamiṣyate /
sauṣiryaṃ lāghavaṃ yatra bhaiṣajyaṃ cāpi khātmakam //

kharatvaṃ ca vivekaś ca raukṣyaṃ cāpy anilātmakam /
snehaḥ kledaś ca śaity aṃ ca mṛdutvaṃ cāpi vārijam //

paicchilyaṃ gauravaṃ mūrtisthairyaṃ gandhaś ca pārthivam /
etairbhūtaguṇairyuktaṃ yaddravyaṃ tattadātmakam //

pañcabhūtātmakaissarvairguṇais tatra samanvitam /
(prativāsaṃ raso gandhastadā praduvanāni ca //

śitamuṣṇodakaṃ caiva raidya cedipriyaṃ rathāḥ /
sajjopakaraṇatvaṃ ca mūlatvakphalasañcayaḥ) //

mūlādīnāṃ sugandhitvaṃ kalyāṇasparśavattathā /
anyūnānatiriktatvarūpavac ca praśasyate //

sthalātmatākanimneṣu saikateṣūpaleṣu ca /
suṣiraṃ nātiviṣṭaṃ ca tiryagyātaṃ ca garhitam //

yenauṣadhārthassadyassyāttena cāpratibadhnatā /
bheṣajaṃ prathamaḥ pādaḥ iti jñeyaṃ cikitsite //

pratiśrāvī dvitīyaḥ syāttasya pratyekaśo guṇāḥ /
balavān dakṣiṇo dakṣaḥ priyavāgajugupsakaḥ //

vīraś cāpratikūlaś ca raktaścitrakathas tathā /
prajñāvāṃś cāpy upasthāyī tathā śāstrānusārataḥ //

na cātipratibadhnīyātsarveṣv auṣadhakarmasu /
praśasyate kleśasahaḥ pratiśrāvī yathāguṇaḥ //

tṛtīyaś cāturaḥ pādaḥ satyāśaṃsī praśasyate /
lakṣaṇaś cātmavāṃś caiva kṛtajñassumanāś ca yaḥ //

auṣadhasya pratigrāhī na ca rogānnigūhayet /
dṛḍhabhakto ' nasūyaś ca yaś cāpi na viṣīdati //

sarvatrāpratikūlaś ca na kriyāmativartate /
ebhir guṇaissamāyuktaṃ jānīyātsādhyamāturam //

bhiṣak caturthaḥ pādas tu sasūtrārthaviśāradaḥ /
arogo dṛṣṭakarmā ca kṛtakṛtyeṣu kovidaḥ //

prayoktā ca pragalbhaś ca kṣamāvānpratibhānavān /
buddhimāṃstarkakuśalo vīryaudāryabalānvitaḥ //

astabdhaś cāpramattaś ca satataṃ saṃyatendriyaḥ /
ojasvī cauṣadhajñaś ca deśakālaprayogavit //

bhiṣak caturthapādaḥ syādevaṃguṇasamanvitaḥ /
bheṣajaṃ ca pratiśrāvī bhiṣagātura eva ca //

anyonyaguṇasaṃyogād ete syus siddhikārakāḥ /
eta eva ca vauguṇyāttasya vyādhivivardhanāḥ //

tasmāc caturṣu pādeṣu cikitsāsiddhiriṣyate /
paktaye kāraṇaṃ pakturyathā pātrendhanānalāḥ //

vijeturvijaye bhūmiś camūḥ praharaṇāni ca /
āturādyās tathā pādāḥ siddhau kāraṇasaṃjñitāḥ //

mṛddaṇḍacakrasūtrādyāḥ kumbhakārādṛte yathā /
nāvahanti guṇān vaidyādṛte pādatrayaṃ tathā /
vidyāt tasmāc cikitsāyāṃ pradhānaṃ kāraṇaṃ bhiṣak // ity āha bhagavān ātreyaḥ iti bhele navamo ' dhyāyaḥ // // daśamo ' dhyāyaḥ // athāta āmapradoṣīyaṃ vyākhyāsyāma iti ha smāha bhagavān ātreyaḥ /