Bhela Samhita · Chapter 1.7

indriyāṇi hi sarvāṇi parijīryanti jīryataḥ /
tasmāt sarvatra vayasi yathākālaṃ striyaṃ vrajet //

na tvanāpyāyitabalaḥ samāgacchet tu yoṣitaḥ /
nāyoniṣu prayuñjīta tiryagyonīś ca varjayet //

na prāptaṃ dhārayed vegaṃ gatvā śītodakaṃ spṛśet /
na tu śrānto na vā bhukto na kliṣṭo ' pyāvilo na ca //

kṛśo nātyaśito vāpi dīno vā maithunaṃ vrajet /
mitavāk satataṃ yaḥ syāt snigdhānnāśī yuvāācaret //

subahusnigdharetāś ca yathartuśayanāśanaḥ /
jīrṇāmāsannasatvāṃ ca vyādhitāṃ malināṃ kṛśām //

vyaṅginīṃ parakāmāṃ ca pūtikoṣṭhāṃ ca varjayet /
balamārogyamāyuś ca vapustejaś ca dehinām //

hīyate hīdṛśīṃ gatvā prāpyākālajarāmiva /
ṛtāvṛtau yathākālaṃ maithunaṃ nā samācaret //

varṣāsu navarātrāt tu daśarātrāccharady api /
pañcāhāddhemasamaye saptāhācchiśire tathā //

pakṣādvasante grīṣme tu māsi māsi samācaret /
nidāghe paścime māse maithunaṃ caiva varjayet //

athavā yauvanotsāhabalasnehasamanvitaḥ /
śiśirāmbukṛtasnāno hṛdyasraganulepanaḥ //

nātivyāyāmanirataḥ kṣīramāṃsaghṛtāśanaḥ /
hṛdyamālyāmbaradharā hṛdyābharaṇabhūṣitāḥ //

hṛdyayauvanasaṃpannāḥ priyāḥ priyakathānugāḥ /
hṛṣṭāḥ sarvatra kāle a śaktyardhena vrajetstriyaḥ //

caturdaśīṃ pañcadaśīmaṣṭamīṃ ca vivarjayet /
pibetkṣīraṃ ghṛtaṃ nityam āyuṣyakaraṇaṃ hitam //

balavarṇakaraṃ hyetadārogyakaraṇaṃ tathā /
saṃhārayed romanakhaṃ trirmāsasya ca mānavaḥ //

oṣadhīś ca maṇīṃś caiva maṅgalyān dhārayetsadā /
mantrānāvartayec cāpi brahmaproktaṃ sanātanam //

sa me mādyāpagāddehādvāyuḥ prāṇāś ca ye sadā /
indro me balamādadyād śivaṃ cāpo diśantu naḥ //

ity evaṃ mantramārṣaṃ vai bhuktvā gatvāt havā striyaḥ /
saṃjapanvai spṛśan vāri tathā ' syāyurna hīyate // ity āha bhagavān ātreyaḥ /
iti bhele saptamo ' dhyāyaḥ // // aṣṭamo ' dhyāyaḥ // athāto mātrāśitīyaṃ vyākhyāsyāma iti ha smāha bhagavān ātreyaḥ /