Bhela Samhita · Chapter 1.6

na vegāndhārayed dhīraḥ prāptānmūtrapurīṣayoḥ /
na vātasya na pittasya na śuklasya kaphasya ca //

udgāracchardijṛmbhāṇāṃ tathā ca kṣavathorapi /
na bāṣpasya na nidrādeḥ prāptaṃ vegaṃ vidhārayet //

rogasañjanakā hyete hiṃsyurāyurvidhāritāḥ /
etāneva prakuryuś ca tathā ' prāptāssamīritāḥ //

vātamūtrapurīṣāṇāṃ dhāraṇādanilādayaḥ /
kupyanti retasaś cāpi śarkarā sāśmarī tathā //

tvagdoṣo vā jvaro vā syāt gātre śophādi vā punaḥ /
chardipittakaphānāṃ tu dhāraṇena samīraṇāt //

jṛmbhādidhāraṇādāndhyaṃ timiraṃ bāṣpadhāraṇāt /
kṣavathūdgāranidrādeḥ dhāraṇātsyācchirorujā //

tasmānmūtrapurīṣaṃ vai visṛjetkālyamutthitaḥ /
uktā hy adhāraṇīyās tu dhāraṇīyānnibodhata //

lobhamohabhiyāṃ tṛṣṇācintayor madamānayoḥ /
śauryasya ca tathā vidvān prāptaṃ vegaṃ vidhārayet //

etaddhārayato hy asya balamāyuś ca vardhate /
udaṅmukhaśśucau deśe prāṅmukhaś cā ' vakuṇṭhitaḥ //

āvaśyakamupāsīta kṛte cādbhir upaspṛśet /
kṛtaśaucastato janturbhakṣayed dantadhāvanam //

dhavaṃ palāśaw nyagrodhaw naktamālamathāpi vā // śirīṣaṃ karavīraṃ ca jātivṛkṣamathārjunam //

eteṣāṃ dantadhavanaṃ śreṣṭhamāha punarvasuḥ /
āpāṭya vidalīkṛtya dantamāṃsamabādhayan //

tadasya śodhayed vaktraṃ pittasya ca kaphasya ca /
śamanaṃ vātaraktādeḥ kurute dantadhāvanam //

mustakalkaṃ satriphalaṃ madhu tailaṃ sukhodakam /
pratyekaṃ kabalagrāhaṃ dhārayed anupūrvaśaḥ //

vātapittakaphā duṣṭāḥ śāmyanti kabalagrahāt /
mādhūkaṃ copadehaghnaṃ svararaktaprasādanam //

tailaṃ dantyaṃ surabhikṛttadabhiṣyandanāśanam /
kṣataṃ saṃrohayed vaktraṃ śīryamāṇaṃ niyacchati //

indriyāṇāṃ mato ' bhyaṅgo gurudoṣavimokṣaṇaḥ /
tvagdoṣaśamano balyo vātaraktaprasādanaḥ //

grāmyadharmātigatyā ca rathāśvagajapātanāt /
daṇḍamuṣṭihatānāṃ ca rujāśramavināśanaḥ //

tvacaḥ prasādano abhyaṅgaḥ śāmyatyutsādanātklamaḥ /
praharṣaṃ kurute sthairyaṃ malaghnaṃ cāvasecanam //

vilepanaṃ hlādayati kaṇḍūṃ hanti prasādanam /
śiśiraṃ hyañjanaṃ dṛṣṭeḥ timiraṃ ca praṇaśyati //

tanūruhendriyabalaṃ nasyatailādupāgatāt /
svararaktaprasādaś ca naśyanti palitāni ca //

svaktaḥ sūtsāditaś caiva praghṛṣṭaś ca yathābalam /
yathartuvāriṇā snātas tv anuliptastataḥ param //

prasādhitottamāṅgaś ca tato nasyaṃ pradāpayet /
tatassaṃśuddhadoṣasya dhūmamasya prakalpayet //

kuṭannaṭailāhrīberaṃ dhyāmakāgarucandanam /
kālānusāryāṃ naladaṃ pṛthvīkām atha guggulam //

tālīsaṃ padmakaṃ mustaṃ priyaṃguṃ sahareṇukām /
haridrāṃ ca sugandhāṃ ca saralāṃ devadāru ca //

śrīveṣṭakaṃ sarjarasaṃ corakaṃ ceti saṃharet /
vaktraṃ ca sarpiṣāktaṃ syād dhūmametaṃ tataḥ pibet //

aṣṭāṃgulapramāṇā vāpy athavā dvādaśāṃgulā /
ṣaḍaṃgulapramāṇā vā dhūmavartiḥ praśasyate //

sauvarṇaṃ rājataṃ tāmraṃ gajadantasya vā punaḥ /
vṛkṣasāramayaṃ vāpi dhūmanetraṃ praśasyate //

caturvā pañcakṛtvo vā dhūmaṃ srotasyavācaret /
vātānulomanaṃ kuryāc chleṣmāṇaṃ cāpakarṣati /
balaṃ dadāti dṛṣṭeś ca samyagdhūmo niṣevitaḥ //

aṣṭau dhūmasya kālāḥ syur yeṣām ante praśasyate /
utthitasyaiva śayanād dantaprakṣālane kṛte //

jalakrīḍānivṛttasya tathā bhuktavato ' śanam /
kṣutoccāravyavāyānte bhuktavāntavatas tathā //

guṇāṃś caikaikaśas teṣāṃ dhūmapānakṛtān śṛṇu /
tatra śayyotthitasyaiva vakṣyāmyatha yathākramam //

hantyutsannaṃ kaphaṃ jantoṣṣaḍindriyavibodhanaḥ /
pratibuddhasya ceddhūmo mārutasyānulomanaḥ //

dantaprakṣālanādūrdhvaṃ rogānsamyagvyapohati /
cyutaśleṣmāpanayanaḥ sugandhiviśadāsyakṛt //

dantamāṃsakṣayakṛtavyādhayo vadaneṣu ye /
doṣāḥ kāsaprabhṛtayastāṃś ca dhūmo vyapohati //

śirogatā yāś ca rujāḥ salilakrīḍanodbhavāḥ /
karṇaśūlaṃ pratiśyāyaṃ cāśu dhūmo vyapohati //

vātapittakaphān dhūmaḥ śamayed bhojanodgatān /
śiroviśuddhiṃ kurute bhuktaṃ ca sthāpayaty api //

dhamanipratipannas tu vāyuḥ kṣavathuneritaḥ /
vyāpnoti sarvasrotāṃsi sa dhūmenānulomyate //

varcaḥkarmoddhato vāyurgalamūrdhaśirogataḥ /
prāṇānādhmāpayati vā sa dhūmenānulomyate //

śuklasrotogato vāyurūrdhvam eva prapadyate /
sa ghorān hi sṛjedrogāṃstaṃ dhūmenānulomayet //

rogādhipataye chardyā sthānebhyo ' bhis amīritāḥ /
anārogyāya kalpante teṣāṃ dhūmaḥ praśasyate //

hṛteṣu doṣeṣv anilaḥ śūnyasthānāni saṃcaran /
sammūrcchati śiro gatvā taṃ dhūmenānulomayet //

pūrvaṃ pītodako bhuktvā labhate kṛśatāṃ naraḥ /
madhye bhaktasya pibato bhojanaṃ nāpakṛṣyate //

bhuktavānatha pānīyaṃ paścād anupibec ca yaḥ /
tadāpyānugataṃ bhuktaṃ samatvāyopapadyate //

agnau pratāpayet pāṇī syātāṃ yāvat tu nirjalau /
tataḥ padaśataṃ gacchedbhaktaṃ hyevaṃ prayātyadhaḥ //

na rātrau dadhi bhuñjīta nāghṛtaṃ nāpy amākṣikam /
kuṣṭhau patepi vāṃchaṃ kiṃ kaṇṭharogāc ca buddhimān //

toyakṣiptaṃ spṛśennānnaṃ na ca paryuṣitāśanaḥ /
na cājīrṇāśano janturjighāṃsurvyādhisaṃbhavam //

sopānatkas tathā daṇḍī chatreṇa vyajanena ca /
ābādhān varjayetsarvānvicaredāpariśramāt //

tapasvinaḥ pitṝndevānbrāhmaṇāṃś ca samāhitaḥ /
arcayanvidhivannityaṃ jīvedvarṣaśataṃ naraḥ //

vāto hi śūlaṃ vihataḥ karoti mūtrapradoṣaṃ janayec ca mūtram /
kāsaḥ pratiśyāyamatho kṣayaṃ ca śvāsaṃ ca kuryād vihate tu vege //

purīṣamānāhamatīva kuryād reto ' varodhaḥ kurute ' tha ṣāṇḍyam /
tasmād dhi vegaṃ na vidhārayeta naro ya icchediha dīrghamāyuḥ // ity āha bhagavān ātreyaḥ /
iti bhele ṣaṣṭho ' dhyāyaḥ // // saptamo ' dhyāyaḥ // athāta indriyopakramaṇīyaṃ vyākhyāsyāma iti ha smāha bhagavān ātreyaḥ /