Bhela Samhita · Chapter 1.5

athāśitena pītena khāditena ca yuktitaḥ /
balamāpyāyate jantoḥ sadyo vahnirivendhanaiḥ //

tenaivātyādṛteneha bhojanena śarīrajāḥ /
vyādhayassaṃpravardhante kāyāgnāvapi dūṣite //

dvividhaṃ tu bhiṣagvidyādāhārasyaiva lāghavam /
dvividhaṃ gauravaṃ bhukte procyamānaṃ nibodhata //

mātrālaghussyādāhāraḥ kaściddravyalaghuḥ smṛtaḥ /
mātrāgurus tathaiva syād dravyataś ca tathā guruḥ //

purāṇaśālayo mudgāḥ śaśatittirilāvukāḥ /
evaṃprakāraṃ yaccānyat taddravyaṃ laghu saṃsmṛtam //

grāmyānūpaudakaṃ māṃsaṃ dadhi piṣṭaṃ tilāhvayam /
evaṃprakāraṃ yaccānyattaddravyaṃ gurviti smṛtam //

tatra yo mātrayā bhuṅkte dravyaṃ gurvapi mānavaḥ /
āhāraṃ tasya paśyanti laghum eva cikitsakāḥ //

śālyādīny api yo ' tyarthamaśnāti sulaghūny api /
āhārassa tathārūpo vyaktaṃ sampadyate guruḥ //

dravyasya laghuno yuktyā sauhity aṃ yo ' dhigacchati /
ekāntapathyaṃ taṃ vidyādāhāraṃ kuśalo laghum //

yadi yuktyāpi sauhityaṃ dravyasyālaghuno vrajet /
tathāvidhamihāhāraṃ gurum eva bravīmyaham //

tasmāt tribhāgasasauhityam ardhasauhityam eva vā /
āhāraṃ laghumanvicchet gurūṇāṃ sevitaṃ sadā //

laghu vāpi samāsādya dravyaṃ yo hy atisevate /
tallaghvapyatisaṃyuktaṃ koṣṭhe sampadyate guru //

gurulāghavavidvaidyo narāṇāṃ vardhayaty asūn /
tasmād evaṃ vijānīyāddravyāṇāṃ gurulāghavam //

evam eva ca bhojyena pathyenāpyāyate naraḥ /
hīyate cāpy apathyena praduṣṭairmārutādibhiḥ //

svasthasyānnena vardhante dhātavaḥ śoṇitādayaḥ /
vyādhitasyāpi doṣāya bhojyaṃ pariṇamaty atha //

yathā hy akālavṛṣṭyā ca bhūmau bījaṃ vipadyate /
vardhate kālavṛṣṭyā ca dehino ' pi tathā rasaiḥ //

yaś ca nityam udāraḥ syāt sukhaniścalamānasaḥ /
laghupānarataḥ sātmye ' pi yathāgasi dūragaḥ //

snāto ' nuliptaḥ sragvī syāddhautadantassvalaṃkṛtaḥ /
dharmassatyamahiṃsā ca prāyo hyannaṃ samāśritam //

vamayecchaleṣmarogāṃś ca paittikāṃś ca virecayet /
nirūhayed vātarogān raktajāṃś cāvasecayet //

raktaśālīn samudgān vā ṣaṣṭikānathavā punaḥ /
susvinnānmātrayāśnīyāt ghṛtasaindhavasaṃyutān //

īṣatpippalikaṃ yūṣamīṣac ca madhunānvitam /
īṣatsalavaṇaṃ cāpi payaś cārdhakṛtaṃ pibet //

viṣkirānpratudāṃś cājān jāṅgalāṃś ca mṛgadvijān /
yac cānyatkaṭukaṃ pāke bhojyaṃ tan nityam ācaret //

pādābhyāṃ na caretkṛṣṭe viṣame kaṇṭakeṣu ca /
gahanaṃ paradārāṃś ca nadīḥ pūrṇāś ca na vrajet //

kalahaṃ cāpi kopaṃ ca rātricaryāṃ vivarjayet /
gajasya na syādāsannaḥ toyārdrasya ca vājinaḥ //

janavādāṃś ca śauṇḍāṃś ca dviṣataś cāpi mānavān /
mlecchānnikṛtibuddhīṃś ca na seveta kadācana //

sarvān sarīsṛpāṃś caiva kṣudrapādāṃś ca na spṛśet /
mahiṣān gavayān khaḍgān vyāghrān siṃhāṃś ca varjayet //

nārohetpādapān veśma na dhāvedvarṣadurjale /
na gavāṃ pratilomaṃ ca na madhye nāgrato vrajet //

sadyaḥ pravṛṣṭau nāroheddhimavantaṃ ca parvatam /
ghṛtamuṣṇāmbu ca bhajedetadārogyam uttamam // ity āha bhagavān ātreyaḥ /
iti bhele pañcamo ' dhyāyaḥ // // ṣaṣṭho ' dhyāyaḥ // atha na vegāndhāraṇīyaṃ vyākhyāsyāma iti ha smāha bhagavān ātreyaḥ /