Bhela Samhita · Chapter 1.4

pippalyo dīpyakaś caiva tathā mūṣikakarṇikāḥ /
bilvasya pallavāḥ śvetā haridrā madhukaṃ tathā //

ete kuṣṭhaṃ pratighnanti yuktāḥ pānapralepanaiḥ /
gavāṃ pittaṃ śunaḥ pittamalāvūṃ kaṭukāṃ tathā //

nimbaṃ nataṃ śarkarāṃ ca dadyāt tadvat pralepanam /
yātuṇḍamaṇḍalīdvīpāt mūlānyeḍagajasya ca //

surādanīṃ sugandhāṃ ca dadyāt tadvat pralepanam /
suvarṇapuṣpīṃ kaṭukāṃ śyāmāṃ tejovatīṃ tathā //

trivṛtsañjātakaṃ caiva kuṣṭhe saṃśodhanaṃ viduḥ /
āragvadhaṃ ca bhārgīṃ ca sāśvagandhāṃ gavādanīm //

śvetāṃ jyotiṣmatīṃ caiva sūkṣmacūrṇāni kārayet /
gavāṃ pittena taccūrṇaṃ saptakṛtvaḥ subhāvitam //

yojyaṃ sarṣapatailena saindhavena ca yuktitaḥ /
etadvai hṛtadoṣasya mitadadhyannabhojinaḥ //

tanulepanamuddiṣṭaṃ kṛmikuṣṭhavināśanam /
gavedhukamakuṣṭhau ca khadirakvāthapācitau //

tāvapyubhau prayuñjīta kuṣṭhināṃ kuṣṭhaśāntaye /
atha kaṇḍūghnavṛkṣāṇāṃ rasāḥ syuḥ kuṣṭhināṃ hitāḥ //

pralepapariṣekeṣu khadiras tu praśasyate /
khadirodaka pāyī syāt khadirodakabhojanaḥ //

bhūyiṣṭhamudakārthe ca kurvīta khadirodaram /
sāravantau mahāvṛkṣau dhavarohita kāvubhau //

śiṃśupā cāśvakarṇaś ca khadiro bilvamāśritaḥ /
kadalīmuṣkakau hiṃsrā bhadrodumbarikāphalam //

etairapyuṣitaṃ kuṣṭhe gomūtraṃ pariṣecanam /
sālāśvakarṇaniryāso niryāsaḥ kuliśasya ca //

ete kuṣṭhanimittānāṃ vraṇānāṃ syuḥ prapīḍakāḥ /
puṇḍarīkasya vakṣyāmi kriyāṃ rogavināśinīm //

āvartāṃ śālmalīmūlaṃ malayūkāṃ sudhāṃ varīm /
bhadrodumbarikāmūlaṃ phalānyāvalgujāni ca //

rātrau yantreṇa niṣpīḍya danticitrakam eva ca /
pāṭhāṃ haridre ca tathā gavāṃ mūtreṇa yojayet //

aṣṭabhāgāvaśiṣṭaṃ tatsādhitaṃ supariṣkṛtam /
pibetkālyaṃ samutthāya śvitrī śītodakaṃ pibet //

sarvataḥ parirakṣet tu sthāpayeccainamātape /
bhaiṣajyapīḍitā doṣās tv acamasyānusaṃśritāḥ //

maṇḍaleṣu tapasphoṭaṃ janayantyarkaraśmibhiḥ /
sphoṭeṣv atha tu jāteṣu chāyāyām upaveśayet //

śītābhir adbhiḥ prakṣālya bhojayed rasabhojanam /
saṃkṣubhyante ' tha vai toyaparipūrṇā ivāmbudāḥ //

sūcyagreṇātha tīkṣṇena vyathayetkaṇṭakena vā /
candanasya ca yatsāraṃ badarāt khadirasya ca //

etaiḥ pānīyapiṣṭais tu sarpiḥkṣaudrasamanvitaiḥ /
patreṣu puṣkariṇyās tu saṃviṣṭasyātha dehinaḥ //

tatas tv ālepayetsphoṭān śītodakapariplutān /
kṣīriṇāṃ cāpi vṛkṣāṇāṃ tvacassaṃkṣodayed bhiṣak //

taiḥ kaṣāyeiś ca kalkaiś ca siñcayel lepayec ca tam /
kharjūrasya ca bījāni śaṅkhanābhiḥ ca dāpayet //

añjanaṃ tagaraṃ patraṃ gairikaṃ nīlamutpalam /
eṣāṃ sūkṣmeṇa cūrṇena sravantamavacūrṇayet //

śakṛddrākṣākṣaudrayukto dātavyaḥ paripoṭane /
āhārotsādanābhyaṅgaṃ pūrveṇa vidhinā bhiṣak //

kārayetkuṣṭhināmevaṃ tataḥ sampadyate sukhī /
na ca vyādhimupekṣeta śarīraṃ patitaṃ budhaḥ /
tvareta śamane tasya pradīptasyeva veśmanaḥ //

yathā hyekāntato vṛkṣo vardhate sukhataśśanaiḥ /
tathā śarīramāsādya rogo vardhata eva tu //

tasmād rakṣanmahāvegādakṣīṇasyaiva dehinaḥ /
prāgevopacayādrogānhanyādvaidyo vicakṣaṇaḥ //

tryahāttryahāccāvapīḍaḥ pakṣānmāsādvamettathā /
recayed ayane pūrṇe sirāmokṣo vidhīyate //

śyāmākāś ca makuṣṭhāni caṇakāḥ kuṣṭhināṃ hitāḥ /
evaṃ hi vartamānānāṃ kuṣṭhaṃ praśamameti vai // ity āha bhagavān ātreyaḥ /
iti bhele caturtho ' dhyāyaḥ // // pañcamo ' dhyāyaḥ // athātyāśitīyaṃ vyākhyāsyāma iti ha smāha bhagavān ātreyaḥ /