Bhela Samhita · Chapter 1.19

vidhinā śoṇitaṃ jātaṃ sevamānasya vāruṇīm /
praduṣyati vidāhena tato rogāya kalpate //

sarvaṃ madyamacakṣuṣyamapauruṣyaṃ tathaiva ca /
upahanti balaṃ nẏṇāmanāyuṣyaṃ ca kīrtyate //

yas tu tadbhajate yuktyā na taṃ vyādhiḥ prasajjate /
atipītaṃ ca tadviddhi tatrāhṛdyaṃ balāya na //

na naktaṃ tu, pibedyuktyā pānaṃ tasmād vicakṣaṇaḥ /
balavarṇakaraṃ hyetadārogyakaraṇaṃ param //

snehapāne tathā mātrāvastikarmaṇi cāpy atha /
kṣāre ca lavaṇe caiva na surā prātiṣidhyate //

bṛṃhaṇaṃ nedṛśaṃ kijcidyathānnasahitā surā /
tāṃ tu rūkṣāṃ viśeṣeṇa nātimātraṃ samācaret //

vātena śleṣmaṇā caiva sampraduṣṭāṃ suśītalā /
viśoṣya dīpayatyeṣā grahaṇīṃ vai śarīriṇām //

yasya koṣṭhagato vāyurduḥkhamutpādayed bhṛśam /
udāvartaṃ sahṛdrogaṃ vātagulmamathāpi ca //

athavā sarvagātreṣu mārutaḥ pratyavasthitaḥ /
yuktāṃ prasannāṃ pibataḥ sa kṣipram upaśāmyati //

hantyāsavaḥ kaphaṃ pittaṃ purīṣaṃ ca bhinattyatha /
madhu pittamariṣṭas tu vātārtiṃ śamayatyatha //

vastiḥ śuddhyati pānena śarkarā cāpi bhidyate /
tejo balaṃ ca harṣaś ca yuktyā pānena vardhate //

kāmaṃ dīpayate svādurbṛṃhaṇo na vipadyate /
tasmāt pānaguṇān buddhvā yathāyogaṃ samācaret // ity āha bhagavān ātreyaḥ /
iti bhele ekonaviṃśo ' dhyāyaḥ // // viṃśo ' dhyāyaḥ // athāto ' rthedaśamūlīyaṃ vyākhyāsyāma iti ha smāha bhagavān ātreyaḥ /