Bhela Samhita · Chapter 1.17

caturvidhamatho bhuktaṃ daśadhā prāṇamṛcchati /
ūṣmasvedaśakṛnmūtrais tathā vātādibhis tribhiḥ //

striyāḥ stanyena śuklena śoṇitena ca vāpy atha /
ity ebhir daśabhiḥ prāṇaḥ sthirībhavati dehinām //

īhate ' mṛtavadvṛttiṃ vātapittakaphaistribhiḥ /
āhārasāmyayogād dhi vaiṣamye vyādhayaḥ smṛtāḥ //

iha dvau bhiṣajau vidyāt jñaś caivājñaś ca dehinām /
tatra jñaḥ sūtravānyaḥ syāt sūtrārthena vicakṣaṇaḥ //

pañcāśrayānkaṣāyāṃś ca bhojanaṃ caturāśrayam /
catuḥśreṣṭhāṃs tathā snehānāmayāṃś cāturāśrayān //

cūrṇapradehānvividhān yavāgūś cāṣṭadhā smṛtāḥ /
dvādaśānnāni pathyāni prāyaścittadvayaṃ tathā //

triṃśataṃ copanāhānāṃ sthāneṣv aṣṭāsu tattvataḥ /
sūtrasthānaṃ cikitsā ca triṃśatriṃśadihocyate //

aṣṭau nidānānyuktāni vimānāni tathaiva ca /
śārīrāṇyaṣṭa gātrāṅgapratyaṅgaṃ yatra varṇitam //

siddhayo dvādaśa proktās tathā kalpendriyāṇi ca /
etadviṃśaśataṃ proktaṃ mūlinyo yatra ṣoḍaśa //

ekonaviṃśatirjñeyāḥ phalinyaḥ kṣīriṇītrayam /
āyurjñānamariṣṭibhyaḥ sādhyāsādhyacikitsitāḥ //

rogajñānaṃ nidānebhyo deśakālau vimānataḥ /
śārīrāddhātusaṃghātaṃ prakṛtiṃ dhātusātmyatām //

anyadevaṃvidhaṃ yac ca śāstre kiṃcidapi śrutam /
bhiṣagyo vai vijānāti sajñaḥ ajñaṃ tu nibodhata //

yo ' nnakāle yavāgūṃ tu sūpakāle tathā rasam /
yūṣakāle ' tha māṃsaṃ tu śodhyeṣu stambhanāni ca //

virecanīye vamanaṃ nirūhye cānuvāsanam /
viparyayeṇa yo ' nyadvā kurute so ' jña ucyate //

yogena vidyām ādadyāt tasmāt tattvadidṛkṣayā /
yathā tamasi dīpaḥ syāt tatrarahā śāstraṃ prakāśakṛt // ity āha bhagavān ātreyaḥ /
iti bhele saptadaśo ' dhyāyaḥ // // aṣṭādaśo ' dhyāyaḥ // athāto ' nnarakṣīyaṃ vyākhyāsyāma iti ha smāha bhagavān ātreyaḥ /